काठमाडौं । प्रधानमन्त्री केपी शर्मा ओलीले सरकार निरोगी नेपाल निर्माणका लागि व्यापक प्रभावकारी प्रयास गरिरहेको बताएका छन्।
मंगलबारदेखि देशभर सुरू गरिएको पाठेघरको मुखको क्यान्सरविरुद्धको (एचपिभी) खोप अभियान उद्घाटन गर्दै उनले सरकारको प्राथमिकता नै स्वस्थ नेपाल निर्माण रहेको स्पष्ट पारे।
प्रधानमन्त्री ओलीका अनुसार, सरकार नागरिकलाई रोगबाट जोगाउन पहल गर्दैछ ताकि कोही पनि अनावश्यक रूपमा बिरामी हुन नपरोस्। “हामीले खाने खाना केवल पेट भर्ने साधन मात्र होइन, यो स्वस्थ जीवन जिउन आवश्यक पोषणको स्रोत पनि हो। स्वस्थ, सन्तुलित र पर्याप्त भोजनले मात्र मानिसलाई निरोगी बनाउँछ,” उनले भने।
प्रधानमन्त्री ओलीले स्वास्थ्य संरक्षणका लागि व्यक्तिगत सतर्कता अनिवार्य रहेको उल्लेख गर्दै स्वस्थ रहन प्रत्येक नागरिकले सावधानी अपनाउनुपर्नेमा जोड दिए। “रोग लागेपछि उपचार गर्नु भन्दा रोग लाग्नै नदिने व्यवस्था गर्नुपर्छ, यसैले हामी पूर्वसावधानीका उपायहरूमा केन्द्रित भएका छौं,” उनले भने।
सरकारले सन् २०३० भित्र पाठेघरको मुखको क्यान्सरविरुद्धको अभियानलाई पूर्ण रूपमा सफल बनाउने लक्ष्य लिएको उनले बताए। स्वस्थ नेपाल, समृद्ध नेपालका लागि सबै नागरिकको सहयोग अपरिहार्य रहेको उनले उल्लेख गरे।
प्रकाशित मिति: २२ माघ २०८१, मंगलबार
प्रतिक्रिया