काठमाडौं । व्यवसायी दुर्गा प्रसाईंले मिटरव्याज पीडितहरुका लागि पठाएको एक ट्रक राहत सामग्री आन्दोलनको अगुवाइ गरिरहेका अभियन्ताले फिर्ता गरेका छन् । राजसंस्था फर्काउन हिँडेका व्यक्तिको सहयोग नलिने भन्दै राहत सामग्री अस्वीकार गरिएको हो ।
पैदल हिँडाएर काठमाडौं ल्याइएका पीडितहरुलाई हिजो खुलामञ्च अगाडिको सडकमै सुताइएको थियो । उनीरुका लागि प्रसाईंले आज बिहान एक ट्रक खाद्यान्न पठाएकोमा आफूहरुले लिन अस्वीकार गरेको अभियन्ता कुमार बर्तौलाले बताए ।
उनले भने, ‘हामीले यस आन्दोलनलाई मिटरव्याज पीडितको संघर्ष भनेर भनिरहेका छौं । पीडितहरुले मधेसका सामन्तहरुले आफूहरुलाई लुटेको भनिरहेका छन् । तर, प्रसाईं राजतन्त्र फर्काउने भनेर हिँडिरहेका छन् । त्यो भएकाले हामीले लिन्नौं भन्यौं ।’
बिहान प्रसाईंका सहयोगी एक ट्रक खाद्यान्न लिएर पीडित बसेकै ठाउँमा पुगेका थिए । उनीहरुले क्यामेरासमेत लिएर आएको बर्तौलाले बताए ।
प्रकाशित मिति: १४ चैत्र २०७९, मंगलबार
प्रतिक्रिया