काठमाडौं । प्रधानमन्त्री पुष्पकमल दाहाल ‘प्रचण्ड’ ले माआवोदी लडाकुहरूलाई राखिएको क्यान्टोनमेन्टमा भ्रष्टाचार नभएको दाबी गरेका छन्।
बिहीबारको प्रतिनिधिसभा बैठकमा सांसदहरूले सोधेका प्रश्नको जवाफ दिने क्रममा प्रधानमन्त्री दाहालले क्यान्टोन्मेन्टमा भ्रष्टाचार भएको आरोप कपोलकल्पित र पूर्वाग्रही रहेको दाबी गरेका हुन्।
उनले यस विषयमा कसैले दिएको उजुरीका आधारमा छानबिन गरी दोषी प्रमाणित भए आफू जेल जान तयार रहेको बताए।
उनले क्यान्टोनमेन्टमा रहेका लडाकुलाई दिएको रकमको सबै रेकर्ड सुरक्षित रहेको बताए। राज्यबाट दिएको रकम अडिट भएर टुंगो लागेको भए पनि पटक-पटक राजनीतिक आग्रह र पूर्वाग्रहका आधारमा यो विषय उठाउने गरिएको उनले बताए।
प्रकाशित मिति: ४ जेष्ठ २०८०, बिहिबार
प्रतिक्रिया