काठमाडौँ । काठमाडौँ महानगरपालिकाका प्रमुख बालेन साहले नेपालमा न्याय पाउनुभन्दा पनि समयमै न्याय पाउन गाह्रो रहेको बताएका छन् ।
मंगलबार ‘न्यायिक समिति: दिग्दर्शन’ पुस्तक लोकार्पण कार्यक्रमलाई सम्बोधन गर्दै उनले यस्तो बताएका हुन् ।
उनले भने, “नेपालमा न्याय प्राप्त गर्नु मात्र चुनौती होइन, समयमा न्याय पाउनु झन् कठिन छ। स्थानीय सरकार नागरिकको नजिकको सरकार भएकाले न्यायिक समितिमा जनताले भरोसा राखेका छन्। हामीले न्यायिक प्रक्रियालाई तीव्र र प्रभावकारी बनाउने प्रयास गरिरहेका छौँ।”
कार्यक्रममा न्यायिक समिति संयोजक तथा काठमाडौँ महानगरपालिकाकी उपमेयर सुनिता डंगोलले महानगरपालिकाको न्यायिक समितिले हालसम्म ८३ वटा मुद्दामा सुनुवाइ गरी न्याय प्रदान गरिसकेको जानकारी दिइन्।
मेयर साहले स्थानीय तहका न्यायिक समितिहरूले जनताको विश्वास जित्दै गएको उल्लेख गर्दै न्याय निरूपणको प्रक्रियालाई अझ प्रभावकारी बनाउनुपर्ने आवश्यकता औंल्याए। साथै, अदालतहरूबाट पनि छिटो र निष्पक्ष न्याय उपलब्ध गराउनुपर्नेमा उनले जोड दिए।
प्रकाशित मिति: ३० माघ २०८१, बुधबार
प्रतिक्रिया