काठमाडौं । राष्ट्रिय युवा फुटबल टोलीका खेलाडी आशिष राईको खुट्टा तीन ठाउँमा भाँचिँदा राज्यबाट कुनै चासो देखाइएको छैन। तर, उही समयमा उपप्रधानमन्त्री विष्णु पौडेल सामान्य घाइते हुँदा राष्ट्रपति, मन्त्री, र उच्च पदस्थ अधिकारीहरूको लर्को अस्पताल पुगेको छ।
घटनाक्रम १: मन्त्री घाइते, तुरुन्तै अस्पतालमा भीड
फागुन ३ गते पोखरामा ‘पोखरा भ्रमण वर्ष’ उद्घाटन समारोहमा हाइड्रोजन ग्यास भरिएको बेलुन पड्किँदा अर्थमन्त्री विष्णु पौडेल र पोखरा महानगरपालिकाका प्रमुख धनराज आचार्य घाइते भए। झिल्काले आगो सल्किएर उनीहरूको शरीरको ५–६ प्रतिशत भाग जलेको छ।
घटनापछि उनीहरूलाई हेलिकोप्टरबाट तुरुन्तै काठमाडौंस्थित कीर्तिपुर बर्न अस्पताल ल्याइयो। उपचारकै क्रममा गृहमन्त्री रमेश लेखक, स्वास्थ्य मन्त्री प्रदीप पौडेल र राष्ट्रपति रामचन्द्र पौडेलसम्म अस्पताल पुगे।
घटनाक्रम २: राष्ट्रिय खेलाडीको खुट्टा भाँचियो, कोही पुगेनन्
त्यही दिन त्रिपुरेश्वरस्थित दशरथ रंगशालामा नेपाल र चीनको युनान प्रान्तीय टोलीबीच मैत्रीपूर्ण खेल भइरहेको थियो। खेलको ३७औं मिनेटमा युनानका खेलाडी मोरी मेडलेले नेपाली मिडफिल्डर आशिष राईलाई ट्याकल गर्दा उनको खुट्टा तीन ठाउँमा भाँचियो।
अखिल नेपाल फुटबल संघ (एन्फा) का अनुसार उनलाई तत्कालै स्टेचरमा राखेर मैदान बाहिर लगियो र सानेपास्थित स्टार अस्पताल पुर्याइयो। गम्भीर चोटका कारण उनी लामो समय फुटबलबाट टाढा रहनुपर्नेछ।
तर, यो घटनाप्रति न राष्ट्रिय खेलकुद परिषद्, न खेलकुद मन्त्रालय, न त एन्फाका उच्च अधिकारीहरूले कुनै चासो देखाएनन्। स्वास्थ्य अवस्था बुझ्न कोही पनि अस्पताल पुगेनन्।
नेताका लागि विशेष उपचार, खेलाडीका लागि उपेक्षा
दुई घटनाले राज्यको प्राथमिकता प्रस्ट देखाउँछ। राष्ट्रिय खेलाडी देशका लागि मैदानमा लड्दा पनि बेवास्ताको सिकार हुन्छन्, तर सामान्य घाइते भएका नेताहरूका लागि राष्ट्रपति र मन्त्रीहरू लर्को लगाएर स्वयं अस्पताल पुग्छन्।
खेलाडीहरू मुलुकका गौरव हुन्। तर, जब उनीहरू गम्भीर घाइते हुन्छन्, राज्य मौन बस्छ। यस्तो असमान व्यवहारले खेलकुद क्षेत्रमा राज्यको उदासीनता उजागर मात्र गर्दैन, खेलाडीहरूलाई हतोत्साहित पनि गर्छ।
राज्यले आफ्नो प्राथमिकता पुनर्विचार गर्ने समय आएको छ।राज्यले खेलाडीहरूलाई सम्मान र आवश्यक सहयोग गर्न आवस्यक छ, ताकि भोलिका दिनमा उनीहरूले देशको नाम अझ उच्च राख्न सकून्।
प्रकाशित मिति: ४ फाल्गुन २०८१, आइतबार
प्रतिक्रिया