काठमाडौं – राष्ट्रिय स्वतन्त्र पार्टी (रास्वपा) का केन्द्रीय सदस्य मोहन थापा अमेरिकामा पक्राउ परेका छन्। अमेरिकी आप्रवासन तथा भन्सार प्रवर्तन निकाय (ICE) ले थापालाई एक हप्ता अघि नियन्त्रणमा लिएको पुष्टि भएको छ।
नेपालबाट अमेरिका जाँदै गर्दा उनलाई पेन्सिल्भेनियाको फिलाडेल्फिया अन्तर्राष्ट्रिय विमानस्थलमा पक्राउ गरिएको थियो। हाल उनी फिलाडेल्फिया संघीय हिरासत केन्द्रमा छन्। रास्वपाका एक वरिष्ठ पदाधिकारीका अनुसार अमेरिकी अध्यागमन विभागको हिरासतमा रहेको जानकारी पार्टीले प्राप्त गरिसकेको छ। यसैबीच, पार्टीको आधिकारिक वेबसाइटबाट केन्द्रीय सदस्यहरूको सूचीबाट थापाको नाम हटाइएको छ।
विवादित गतिविधिमा संलग्न रहेको आरोप
थापामाथि पार्टी अध्यक्ष रवि लामिछानेका निकट सहयोगीका रूपमा अमेरिकामा चन्दा संकलनको अभियान सञ्चालन गरिरहेको आरोप लाग्दै आएको थियो। विशेषगरी, उनले बाल्टिमोर क्षेत्रमा लामिछानेका लागि आर्थिक संकलन गरिरहेको विषयमा विवाद उत्पन्न भएको थियो। साथै, लामिछाने गृहमन्त्री हुँदा प्रहरी अधिकृतहरूको सरुवा–बढुवा गराइदिने प्रलोभन देखाएर रकम असुली गरेको आरोप पनि थापामाथि लाग्दै आएको छ।
रास्वपाका पूर्व सांसद डा. ढाकाकुमार श्रेष्ठले आफूलाई मन्त्री बनाउन थापाले आर्थिक लेनदेनको प्रस्ताव राखेको दाबी गरेका थिए। यस्तै, थापाले पार्टी स्थापनाकालदेखि नै लामिछानेको नाम प्रयोग गरेर विभिन्न ठगी गतिविधि सञ्चालन गरेको भन्ने आरोप पनि विभिन्न व्यक्तिहरूबाट सार्वजनिक हुँदै आएका छन्।
थापा यसअघि पनि कानुनी कारबाहीमा परेका थिए
थापा अमेरिकाको मेरील्याण्ड राज्यको बाल्टिमोरमा बस्दै आएका थिए। उनी बाल्टिमोर एसोसिएसन अफ नेप्लिज इन अमेरिका (BANA) का संस्थापक अध्यक्षसमेत हुन्। स्रोतका अनुसार, थापासँग अमेरिकी स्थायी आवासीय अनुमति (Green Card) छ, तर उनले रास्वपाको केन्द्रीय सदस्यको जिम्मेवारी सम्हालिरहेका थिए।
थापा यसअघि पनि मेरील्याण्डमा सवारी चालक अनुमतिपत्र (ड्राइभिङ लाइसेन्स) दुरुपयोग मुद्दामा जेल परेका थिए। अमेरिकी अध्यागमन नियमअनुसार, ग्रीन कार्ड भएका व्यक्तिहरूले लामो समय अमेरिका बाहिर बिताएमा उनीहरूमाथि सोधपुछ हुने गरेको छ। हाल थापाको गिरफ्तारीको कारणबारे आधिकारिक रूपमा कुनै विस्तृत जानकारी सार्वजनिक भइसकेको छैन।
पार्टीले भने हालसम्म औपचारिक रूपमा थापाबारे कुनै निर्णय लिएको छैन।
प्रकाशित मिति: १८ फाल्गुन २०८१, आइतबार
प्रतिक्रिया