काठमाडौं । काठमाडौंको तीनकुनेमा हालै भएको राजावादी प्रदर्शनका क्रममा भएको हिंसात्मक घटनाबारे जवाफ माग्दै सांसदहरूले पूर्वराजा ज्ञानेन्द्र शाहलाई संसद्मा उपस्थित गराउन प्रस्ताव गरेका छन्।
संसद्को कानुन, न्याय तथा मानव अधिकार समितिमा छलफलको क्रममा नेपाली कांग्रेसका सांसद जीवन परियारले पूर्वराजालाई समितिमा उपस्थित गराई घटनाको विषयमा सोधपुछ गर्नुपर्ने बताएका छन्। “पूर्वराजा ज्ञानेन्द्रलाई समितिमा बोलाएर घटना सम्बन्धी स्पष्ट स्पष्टीकरण लिनुपर्छ,” परियारले भने।
उनले पूर्वराजा पनि अन्य आम नागरिक सरह भएको उल्लेख गर्दै थपे, “उहाँलाई पनि संविधानले दिएको हक बराबरका छन्, तर लोकतान्त्रिक मूल्य–मान्यता मिच्ने वा अराजकता मच्चाउने अधिकार कसैलाई पनि छैन।”
तीनकुने घटनाप्रति गम्भीर चासो व्यक्त गर्दै कांग्रेस, एमाले, माओवादी केन्द्र र एकीकृत समाजवादी पार्टीका सांसदहरूले समेत पूर्वराजालाई संसद्मा जवाफदेही बनाउनुपर्ने धारणा राखेका छन्।
गत चैत १५ गते राजधानीको तीनकुने क्षेत्रमा राजावादी समुहले आयोजना गरेको प्रदर्शन उग्र बनेपछि भएको झडपमा दुई जनाको ज्यान गएको थियो। उक्त घटनामा निजी सम्पत्तिमा क्षति पुगेको छ भने नेकपा एकीकृत समाजवादीको पार्टी कार्यालयमा आगजनी समेत भएको थियो।
प्रकाशित मिति: २८ चैत्र २०८१, शुक्रबार
प्रतिक्रिया