काठमाडौं । अमेरिकी राष्ट्रपति डोनाल्ड ट्रम्पद्वारा सामाजिक सञ्जालमा हालै पोस्ट गरिएको एक एआई-निर्मित तस्बिरले विश्वव्यापी रूपमा विवाद उत्पन्न गरेको छ। उक्त तस्बिरमा ट्रम्पलाई रोमन क्याथोलिक धर्मगुरु पोपको भेषमा देखाइएको छ, जुन धेरैले आपत्तिजनक र अपमानजनक ठानेका छन्।
ट्रम्पले उक्त तस्बिर आफ्नो ट्रुथ सोसल खातामा कुनै क्याप्सनबिना पोस्ट गरेका थिए। तस्बिर सार्वजनिक भएपछि यो भाइरल बनेको छ र विशेषगरी क्याथोलिक समुदायमा यसको कडा आलोचना भइरहेको छ।
यो घटनाक्रम २१ अप्रिलमा पोप फ्रान्सिसको निधनपछिको संवेदनशील समयमा आएको हो। हाल भ्याटिकनमा नयाँ पोप चयनको तयारी भइरहेकाले धार्मिक वातावरण थप संवेदनशील बनेको छ। आगामी ७ मेबाट सुरु हुने कन्क्लेभ (नयाँ पोप चयन प्रक्रिया) को पूर्वसन्ध्यामा ट्रम्पको यो पोस्ट सार्वजनिक हुनु झन् विवादास्पद बनेको छ।
यसअघि २९ अप्रिलमा पत्रकारहरूसँग कुरा गर्दै ट्रम्पले ‘म पोप बन्न चाहन्छु, त्यो मेरो पहिलो रोजाइ हुनेछ’ भन्दै हाँस्यव्यङ्ग्य गरेका थिए। तर एआई तस्बिरमार्फत उक्त ठट्टालाई उनले अझै गम्भीर ढंगले प्रस्तुत गरेको भन्दै आलोचना गरिएको छ।
धेरै प्रयोगकर्ताहरूले यो तस्बिरलाई ‘पवित्रताको अपमान’ भन्दै ट्रम्पको आलोचना गरिरहेका छन्। धार्मिक भावनामा चोट पुगेको भन्दै विभिन्न समुदायले आक्रोश व्यक्त गरेका छन्। यद्यपि, ट्रम्पका समर्थकहरू भने यसलाई केवल रमाइलो र हाँस्यका रूपमा व्याख्या गर्दै समर्थन जनाइरहेका छन्।
प्रकाशित मिति: २१ बैशाख २०८२, आइतबार
प्रतिक्रिया