काठमाडौं । भारत र पाकिस्तानबीच युद्ध प्रारम्भ भएपछि भारत तथा चीनका रक्षा क्षेत्रका कम्पनीहरूको सेयर मूल्यमा उल्लेखनीय उकालो देखिएको छ। अन्तर्राष्ट्रिय समाचार एजेन्सीहरूका अनुसार, युद्धको प्रभावले दुवै देशका रक्षा बजारमा नयाँ गति ल्याएको छ।
भारततर्फ, हिन्दुस्तान एयरोनटिक्स लिमिटेड, गार्डेन रिच शिपबिल्डर्स एन्ड इन्जिनियर्स, भारत इलेक्ट्रोनिक्स, र माजागन डक शिपबिल्डर्सजस्ता कम्पनीहरूको सेयर मूल्यमा तीव्र वृद्धि देखिएको छ। त्यस्तै, ड्रोन तथा हतियार उत्पादन गर्ने पारस डिफेन्स एण्ड स्पेस टेक्नोलोजीको सेयर मूल्यमा समेत उच्च बृद्धि भएको छ, जसले लगानीकर्ताहरूको ध्यान खिचेको छ।
चीनतर्फ पनि रक्षा उद्योगमा सशक्त प्रगति देखिएको छ। पाकिस्तानलाई रक्षा सामग्री आपूर्ति गर्ने चिनियाँ कम्पनीहरूले उल्लेखनीय व्यापारिक लाभ हासिल गरिरहेका छन्। विशेषगरी, लडाकु विमान निर्माण गर्ने ‘एभिक चेङ्दु एयरक्राफ्ट’ कम्पनीको सेयर मूल्य दिनको मध्यभागसम्म २० प्रतिशतले बढेको छ।
त्यस्तै, चीनको समग्र रक्षा सूचकांक ४ प्रतिशतभन्दा बढीले उकालो लागेको छ भने शीर्ष १० रक्षा ठेकेदार कम्पनीहरू समावेश गरिएको सूचकांकमा ११ प्रतिशतको वृद्धिले बजारलाई उत्साहित बनाएको छ।
विश्लेषकहरूका अनुसार, भारत र चीनबीचको रक्षा बजारमा देखिएको यो चपलता दुवै देशबीचको रणनीतिक प्रतिस्पर्धाको संकेत हो, जसले अन्तर्राष्ट्रिय रक्षा लगानीको दिशा समेत निर्धारण गर्न सक्नेछ।
प्रकाशित मिति: २४ बैशाख २०८२, बुधबार
प्रतिक्रिया