काठमाडौं । नेपाली कांग्रेसका सांसद रामहरि खतिवडाले पाकिस्तानप्रेरित आतंकवादविरुद्ध भारतले थालेको अभियानमा नेपालले पनि समर्थन जनाउनुपर्ने बताएका छन्।
प्रतिनिधिसभाको बैठकमा बोल्दै सांसद खतिवडाले आतंकवाद सम्पूर्ण मानव सभ्यताका लागि खतरा भएकाले त्यसविरुद्धको लडाइँमा नेपालले कुनै पनि मुलुकलाई साथ दिनु उपयुक्त हुने उल्लेख गरे। उनले भने, “भारतले पाकिस्तानको आतंकवादविरुद्ध थालिएको अभियानले हामी पनि संवेदनशील अवस्थामा छौं। यस्तो चुनौतीपूर्ण परिस्थितिको सामना गर्न सरकार तयारी अवस्थामा रहनुपर्छ। साथै, आतंकवादविरुद्धको लडाइँमा जुनसुकै देश होस्, हामीले समर्थन जनाउनुपर्छ।”
सांसद खतिवडाले धितो कर्जा बोर्डका अध्यक्षमाथि लागेको कमिसन प्रकरणको निष्पक्ष छानबिन गर्न पनि सरकारको ध्यानाकर्षण गराए। साथै, अख्तियार प्रमुखको पछिल्लो अभिव्यक्तिलाई गम्भीरतापूर्वक लिनसमेत सरकारलाई आग्रह गरे।
प्रकाशित मिति: २५ बैशाख २०८२, बिहिबार
प्रतिक्रिया