काठमाडौं । राप्रपाका अध्यक्ष राजेन्द्र लिङ्देनले वैशाख २५ गतेलाई राजसंस्था पुनःस्थापना, हिन्दु राष्ट्रको घोषणासहित संघीयता खारेजीको आन्दोलनको लागि महत्वपूर्ण दिनको रूपमा वर्णन गरेका छन्।
नवराज सुवेदीको नेतृत्वमा गठित संयुक्त जनआन्दोलन समितिले काठमाडौंमा आयोजना गरेको पत्रकार सम्मेलनलाई सम्बोधन गर्दै लिङ्देनले गणतन्त्र र धर्मनिरपेक्षताको अन्त्य गर्दै राजासहितको प्रजातन्त्र स्थापनाका लागि स्पष्ट ध्रुवीकरण आवश्यक रहेको बताए।
उनले राजसंस्था र हिन्दु राष्ट्रको पक्षमा रहेका सबै राजनीतिक दलका नेता तथा कार्यकर्ताहरुलाई एकताबद्ध भएर राष्ट्रवादी आन्दोलनमा सहभागी हुन आह्वान गरे। लिङ्देनका अनुसार यो आन्दोलन केवल कुनै दलको नभई सम्पूर्ण देशको हितका लागि हो, जसमा देशवासी सबैको सहभागिता अपरिहार्य छ।
अध्यक्ष लिङ्देनले यो आन्दोलन सफल नभएसम्म नरोकिने स्पष्ट घोषणा गर्दै, “देश अहिलेको अवस्थामा रहिरहन सक्दैन। अब नयाँ राष्ट्रिय सहमतिको खाँचो छ, जसमा राजासहित सबै शक्ति समेटिने गरी व्यवस्था गरिनुपर्छ,” भने। उनले गणतन्त्र पक्षधरहरूले आन्दोलनलाई दमन गरेर थुनिएको बाटोको प्रयोग गर्न खोजेमा त्यसको गम्भीर परिणाम भोग्न तयार रहनु पर्ने चेतावनीसमेत दिए।
लिङ्देनले सरकार र सत्ता पक्षलाई जनताको आवाजलाई बुझेर दमन र जालझेलको सहारा नलिई संवादमार्फत समाधान खोज्न आग्रह गरे। साथै, उनले आधुनिक विश्वका धेरै प्रगतिशील राष्ट्रहरूमा समेत राजसंस्था रहेको उल्लेख गर्दै, राजसंस्थाको पक्षमा बोल्नु लोकतन्त्रको विरोध होइन भनी प्रष्ट पारे।
अन्त्यमा लिङ्देनले राप्रपाले अबदेखि गर्ने सम्पूर्ण कार्यक्रमहरू यो आन्दोलनको अविभाज्य अङ्गका रूपमा सञ्चालन गरिने घोषणा गर्दै देशव्यापी आन्दोलनलाई अझ सशक्त बनाउने प्रतिवद्धता व्यक्त गरे।
प्रकाशित मिति: २५ बैशाख २०८२, बिहिबार
प्रतिक्रिया