एजेन्सी । भारतीय सेनाले शुक्रबार र शनिबारको मध्यरातमा पाकिस्तानले भारतको पश्चिमी सिमानामा आक्रमण गरेको आरोप लगाएको छ। सेनाको अतिरिक्त जनसम्पर्क महानिर्देशनालयका अनुसार पाकिस्तानले ड्रोनसहित विभिन्न हतियार प्रयोग गर्दै भारतको सार्वभौमसत्तामाथि आक्रमण गरेको जनाएको छ।
सेनाले सार्वजनिक गरेको विज्ञप्तिमा उल्लेख छ, “शनिबार बिहान ५ बजे अमृतसरको खासा क्यान्ट क्षेत्रमाथि दर्जनौँ सशस्त्र ड्रोनहरू उडिरहेको देखिएको थियो। तर, हाम्रो वायु रक्षा प्रणालीले ती सबैलाई समयमै निष्क्रिय पार्न सफल भयो। पाकिस्तानको यस्तो कदम भारतको सार्वभौमसत्तामाथि गम्भीर उल्लङ्घन हो, जसले आम नागरिकको सुरक्षामा खतरा सिर्जना गरेको छ।”
यसअघि शुक्रबार राति जम्मू सहरको रेहरी कोलोनीमा पनि पाकिस्तानले आक्रमण गरेको भारतीय पक्षको दाबी छ। स्थानीय बासिन्दाहरूका अनुसार सो आक्रमणमा आवासीय क्षेत्रमा क्षति पुगेको छ। घरका झ्यालहरू फुटेका छन् भने धेरै सवारी साधनसमेत क्षतिग्रस्त भएका छन्।
स्थानीय बासिन्दा राकेश गुप्ता भन्छन्, “एक ठूलो विस्फोट भयो र सम्पूर्ण क्षेत्र धुवाँले ढाकिएको थियो। त्यति ठूलो त्रास हामीले पहिलो पटक अनुभव गर्यौँ। पाकिस्तानले सामान्य नागरिकहरूलाई किन लक्षित गरिरहेको छ, हामीलाई थाहा छैन।”
बीबीसीका अनुसार आक्रमणमा घाइते भएकाहरूलाई नजिकको अस्पतालमा उपचारका लागि लगिएको छ। जम्मू कश्मीरका मुख्यमन्त्री उमर अब्दुल्लाह घटनास्थल अवलोकनका लागि पुगे पनि, माथिबाट लडाकु विमान उड्न थालेपछि उनलाई तत्काल क्षेत्र खाली गर्न भनिएको थियो। त्यतिबेला हवाई आक्रमणको चेतावनीसहित साइरन बजाइएको थियो।
पाकिस्तानी प्रतिक्रिया: ‘अपरेसन बन्यान मार्स’ सुरु
दोस्रो पक्ष पाकिस्तानले भने भारतको सैन्य आक्रमणको जवाफस्वरूप कारबाही थालेको दाबी गरेको छ। सरकारी टेलिभिजनमार्फत पाकिस्तानी सेनाका प्रवक्ता लेफ्टिनेन्ट जनरल अहमद शरीफ चौधरीले भारतीय आक्रमणको जवाफमा ‘अपरेसन बन्यान मार्स’ सुरु गरिएको बताएका छन्।
चौधरीका अनुसार पाकिस्तानी वायु रक्षा प्रणालीले धेरै भारतीय क्षेप्यास्त्रहरू आकाशमै खसाल्न सफल भएको छ। उनले पाकिस्तानी सेना पूर्ण रूपमा तयारी अवस्थामा रहेको र देशको सुरक्षामा कुनै सम्झौता नगर्ने बताए।
पाकिस्तानले निशाना बनाएको भनिएको विमानस्थलहरूमध्ये रावलपिन्डीस्थित नूर खान एयरबेस पनि एक हो, जुन इस्लामाबाददेखि झण्डै १० किलोमिटर टाढा पर्छ।
भारतले यसअघि मे ७ तारिखका दिन बिहानै ‘अपरेसन सिन्दूर’ अन्तर्गत पाकिस्तान र पाकिस्तान प्रशासित कश्मीरका केही स्थानमा हवाई आक्रमण गरेको थियो। उक्त कारबाहीमा ३३ जनाको मृत्यु भएको र ठूलो संरचनात्मक क्षति पुगेको पाकिस्तानले पुष्टि गरिसकेको छ।
भारत–पाकिस्तानबीचको हालको तनावको सुरुआत भने अप्रिल २२ मा जम्मू कश्मीरको पहलगाममा भएको एक भीषण आक्रमणबाट भएको हो, जसमा २६ जनाको ज्यान गएको थियो।
प्रकाशित मिति: २७ बैशाख २०८२, शनिबार
प्रतिक्रिया