काठमाडौं । नेपाल कम्युनिष्ट पार्टी (माओवादी केन्द्र)का अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ले जनताको हितमा संविधान संशोधन आवश्यक भएको बताएका छन्।
आइतबार किरात र लिम्बूवान् राष्ट्रिय मुक्ति मोर्चा, नेपालद्वारा आयोजित संयुक्त राष्ट्रिय सम्मेलन उद्घाटन गर्दै अध्यक्ष दाहालले संविधानलाई परिवर्तनको दस्तावेज होइन, सुधार र परिमार्जनको आधारका रूपमा लिनुपर्ने धारणा व्यक्त गरे।
उनले संविधान जनताको आकांक्षा र समयअनुसारको आवश्यकता पूरा गर्न सक्षम हुनुपर्छ भन्दै त्यसका कमजोरीहरू सच्याउँदै अगाडि बढ्नुपर्ने बताए।
संविधान निर्माणदेखि सङ्घीय संरचनाको आधार तयार गर्न माओवादी आन्दोलनको भूमिकाले वर्गीय र जातीय उत्पीडन अन्त्य गर्न ऐतिहासिक मोड दिएको उनले उल्लेख गरे।
“समावेशिता, प्रतिनिधित्व र समानताको सवालमा हाम्रो पार्टीले खेलेको भूमिका सबैलाई थाहा छ,” दाहालले भने, “अब जहाँ कमजोरी छन्, ती संशोधन गर्दै अघि बढ्नुपर्छ। हामीले वर्गीय, जातीय, लैङ्गिक र क्षेत्रीय विभेद अन्त्य गर्न मात्र होइन, त्यसलाई संस्थागत गर्दै शान्तिपूर्ण राजनीतिक प्रक्रियामा रूपान्तरण गर्न निरन्तर क्रियाशील छौं।”
पूर्वप्रधानमन्त्री दाहालले संविधानको संरक्षण, लोकतन्त्रको सुदृढीकरण, आर्थिक विकास र समृद्धिका लागि कृषिलगायत जनताले भोगिरहेका समस्याहरू समाधान गर्न प्रतिबद्ध भएर अघि बढ्नुपर्नेमा पनि जोड दिए।
यसरी, उनले संविधानलाई जनमुखी बनाउन संशोधनको आवश्यकतालाई प्राथमिकतामा राख्दै समावेशी लोकतन्त्रलाई संस्थागत गर्न सबै पक्ष एकजुट हुनुपर्ने सन्देश दिएका छन्।
प्रकाशित मिति: २८ बैशाख २०८२, आइतबार
प्रतिक्रिया