काठमाडौं । संसदीय समितिले संसद्को आगामी हिउँदे अधिवेशन नयाँ भवनबाट सञ्चालन हुने वातावरण मिलाउन सरकारलाई निर्देशन दिएको छ । राज्यका निर्देशक सिद्धान्त, नीति र दायित्वको कार्यान्वयन, अनुगमन तथा मूल्यांकन समितिको बैठकले आगामी हिउँदे अधिवेश प्रतिनिधिसभा र राष्ट्रियसभा नयाँ भवनमा सञ्चालन हुनुपर्ने निष्कर्ष निकालेको हो ।
समितिका सभापति ठाकुरप्रसाद गैरेले सम्झौतानुसार फिल्डमा कार्यरत रहनुपर्ने मेसिनरी, मेट्रियल र म्यानपावरको दैनिक अनुगमन गर्न, सामग्री तथा गुणस्तरको निरन्तर अनुगमन र देखिएको कमजोरीको तत्काल सुधार गर्नुपर्ने निर्देशन दिन सरकारलाई निर्देशन दिए । उनले प्रविधि जडान र इन्टेरियर कार्यको सचिवालयका सम्बन्धित अधिकारीसँग निरन्तर समन्वय र तोकिएको समयमा काम हुने गरी अनुगमन गर्न सरकारलाई आग्रह गरे ।
सभापति गैरेले हरेक महिना कार्य प्रगतिको अन्तिम मूल्यांकन र निष्कर्षसहितको १५–१५ दिनको रिपोर्ट तयार गरी समितिलाई समेत पठाउनुपर्ने बताए ।
“अहिले जुन परिस्थिति छ, हाम्रो स्पिरिट आउने हिउँदे अधिवेशनमा प्रतिनिधिसभा र राष्ट्रियसभा नयाँ संसद् भवनमा सञ्चालन हुने परिस्थिति बन्नुपर्छ भन्ने हाम्रो स्पिरिट हो,” उनले भने ।
उनले तोकिएको समयमा नयाँ संसद् भवन निर्माण नभएकोप्रति असन्तुष्टि व्यक्त गरे ।
प्रकाशित मिति: १ जेष्ठ २०८२, बिहिबार
प्रतिक्रिया