काठमाडौँ । वर्तमान केपी शर्मा ओली नेतृत्वको सरकारमा नेपाली कांग्रेसकी नेतृ डा. आरजु राणा देउवा परराष्ट्रमन्त्रीको जिम्मेवारीमा छन्। उनी नेपाली कांग्रेसका सभापति शेरबहादुर देुवाकी पत्नीसमेत हुन्। तर, परराष्ट्र मन्त्रालयको काम कारबाहीप्रति न केवल प्रतिपक्षी दलहरू, तर कांग्रेसकै नेताहरू पनि असन्तुष्ट देखिन थालेका छन्।
वैशाख २४ गते प्रतिनिधिसभाको बैठकमा कांग्रेसका नेता तथा पूर्वपरराष्ट्रमन्त्री एनपी साउदले भारत-पाकिस्तान सम्बन्ध तनावग्रस्त रहेको अवस्थामा पाकिस्तानी सेनाको भ्रमणलाई लिएर कूटनीतिक विवेकको कमी देखिएको भन्दै संसद्मै असन्तुष्टि जनाए।
साउदले भने, “पहलगाममा भएको आतंकी घटनापछि भारत र पाकिस्तानबीच चिसोपन थपिएको छ। यस्तो संवेदनशील समयमा पाकिस्तानी सैन्य टोलीलाई नेपाल भ्रमणमा ल्याउनु उचित थिएन। भ्रमण पूर्वनिर्धारित भए पनि तत्कालको परिस्थितिलाई ख्याल गरेर स्थगन गर्न सकिन्थ्यो।”
पाकिस्तानी हवाई कमाण्डर साद मन्सूर अन्सारीको नेतृत्वमा १२ सदस्यीय टोली वैशाख २१ गते नेपाल आएको थियो। उनीहरू ६ दिन नेपाल बसेर फर्किएको पुष्टि भएको छ।
साउदको यो अभिव्यक्तिले कांग्रेसभित्र तरंग ल्याएको छ। विशेषतः सभापति देउवा निकटका नेताहरूले साउदको टिप्पणीलाई चकित हुने गरी हेरिरहेका छन्। केही नेताहरूले देउवाको ध्यानाकर्षणसमेत गराएको स्रोतहरूले जनाएका छन्। देउवाले ‘म एनपीलाई भन्छु’ भनेको बताइए पनि यसबारे आधिकारिक रूपमा केही खुलेको छैन।
यद्यपि, साउदले व्यक्तिगत होइन, नीतिगत असन्तुष्टि जनाएका हुन्। “म कसैको व्यक्ति होइन, पदमा बसेर विवेक देखाउनुपर्ने विषयमा बोलेको हुँ,” उनले स्पष्टीकरण दिए।
पूर्वपरराष्ट्रमन्त्रीसमेत रहेका साउद २०८० वैशाख ३ गते गठबन्धन सरकारमा परराष्ट्रमन्त्री बनेका थिए। तर, माओवादी केन्द्रका अध्यक्ष पुष्पकमल दाहाल ‘प्रचण्ड’ ले गठबन्धन परिवर्तन गरेपछि फागुन २१ गते साउदको कार्यकाल टुंगिएको थियो।
सरकारको कार्यशैलीप्रति पनि साउदले विभिन्न कार्यक्रमहरूमा आलोचना गरिरहेका छन्। जेठ २ गते महोत्तरीको जलेश्वरमा आयोजित कांग्रेसको कार्यक्रममै उनले दुईतिहाई बहुमतको सरकार जनअपेक्षाअनुसार काम गर्न असफल भएको आरोप लगाए।
“जनताले देख्ने गरी परिणाम दिन नसकेको सरकारबाट म सन्तुष्ट छैन,” साउदले भने। उनले यसअघि पुस १८ गते बुटवलमा पत्रकारहरूसँगको कुराकानीमा प्रधानमन्त्री ओलीको अभिव्यक्तिसमेत संवेदनशील नभएको भन्दै आलोचना गरेका थिए।
उनको भनाइ अनुसार, दुई ठूला दलबीच न्यूनतम सहमति कार्यान्वयनमै गम्भीर कमजोरी देखिएको छ। “बलियो सरकार भएर पनि जनतामा विश्वास जगाउन नसक्नु दुर्भाग्यपूर्ण हो,” उनले बताए।
यसरी, पार्टीभित्रकै नेताबाट आएको आलोचनाले कांग्रेस र वर्तमान सरकारको नीति तथा नेतृत्वमाथि थप प्रश्न उठ्न थालेको छ। विशेषगरी, परराष्ट्र मामिलामा देखिएको असन्तुलनले कूटनीतिक विवेकको पुनरावलोकन गर्नुपर्ने आवश्यकतामा संकेत गरेको देखिन्छ।
प्रकाशित मिति: ४ जेष्ठ २०८२, आइतबार
प्रतिक्रिया