काठमाडौँ । काठमाडौँबाट लुक्लाका लागि उडेको समिट एयरको उडान नम्बर ३०१ ले प्राविधिक समस्या देखिएपछि त्रिभुवन अन्तरराष्ट्रिय विमानस्थलमा आकस्मिक अवतरण गरेको छ।
विमानस्थलका प्रवक्ता रिञ्जी शेर्पाका अनुसार विमानले उडान भरेपछि सोलुखुम्बुको फाफ्लु क्षेत्र नजिक पुग्दा इञ्जिनमा समस्या देखिएको हो। समस्या देखिएपछि पाइलटले सुरक्षाका लागि तुरुन्तै काठमाडौँ फर्किने निर्णय गरेका थिए। बिहान ७ बजेर २४ मिनेटमा विमान त्रिभुवन विमानस्थलमा सुरक्षित अवतरण गरिएको थियो।
विमानमा चालक दलका सदस्यसहित १९ जना यात्रु सवार थिए। सबै यात्रु सकुशल रहेका छन्। इञ्जिनमा देखिएको समस्याबारे प्राविधिक टोलीले हाल मर्मत कार्य गरिरहेको जनाइएको छ।
प्रकाशित मिति: ५ जेष्ठ २०८२, सोमबार
प्रतिक्रिया