हेटौंडा । मकवानपुरको हेटौंडा उपमहानगरपालिका–८ कमानेस्थित नमुना टोलमा खाना बनाउने क्रममा आगलागी हुँदा दुई जना घाइते भएका छन्।
बुधबार साँझ देवान बाबुको घरमा डेरा गरेर बस्दै आएकी वीरगञ्जकी सलाउद्दिन देवानकी १३ वर्षीया छोरी असिया खातुन र भारत बिहारको मोतिहारी जिल्ला, आदामपुर गाउँकी २५ वर्षीया अफ्रिदा खातुन आगलागीमा परेर घाइते भएका हुन्।
साँझ मासु पकाउने क्रममा तेल भनेर झुक्किएर कराईमा डिजेल हालिएको कारण अचानक आगो लागेको थियो।
जिल्ला प्रहरी कार्यालय मकवानपुरका सूचना अधिकारी डिएसपी श्यामु अर्यालका अनुसार आगोले असिया खातुनको अनुहार, हात, पिठ्यूँ र खुट्टामा गम्भीर रूपमा चोट पुगेको छ। अफ्रिदा खातुन पनि घाइते भए पनि अवस्था खतरामुक्त रहेको प्रहरीले जनाएको छ।
आगलागीपछि स्थानीयवासी र प्रहरीको सहयोगमा आगो नियन्त्रणमा लिइएको थियो।
प्रकाशित मिति: ८ जेष्ठ २०८२, बिहिबार
प्रतिक्रिया