काठमाडौं । नारायणगढ–मुग्लिन सडकको २६ किलोमिटर क्षेत्रको भासिएको भाग चालु आर्थिक वर्षमा मर्मत हुन नसक्ने भएको छ। यस क्षेत्रमा १६५ मिटर लम्बाइमा सडक भासिएको छ।
गत असोज महिनामा आएको अविरल वर्षाले उक्त स्थानमा सडक भासिएको थियो। सो क्षेत्रको ८५ मिटर लम्बाइ र ३.५ मिटर चौडाइ आठ मिटर तलसम्म भासिएको छ, जबकि बाँकी भागमा चिरा परेको छ। डिभिजन सडक कार्यालयका प्रमुख नारायण लामिछानेका अनुसार, अब मर्मत गर्दा सबै भासिएको भागलाई एकैसाथ निर्माण गर्नुपर्नेछ।
बजेटको अभावका कारण चालु वर्षमा मर्मत कार्य अघि बढ्न नसकेको हो। वर्षाका कारण कालोपत्रेको तलको माटो बगेर खोक्रो बनेपछि सडक भासिएको हो। लामिछानेले भने, “अठारदेखि २५ मिटर सम्म पायल राखेर मर्मत गर्नुपर्ने छ।” यसका लागि सोहीअनुसारको डिजाइन तयार गरि सडक विभागमा पेस गरिएको थियो। माघ महिनामा डिजाइन तयार भए पनि, फागुनमा बजेट सुनिश्चितता नभएपछि यस वर्ष मर्मत कार्य सुरू गर्न नसकिएको उनले बताए।
भासिएको भाग मर्मत गर्न करीब रु ३२ करोड लाग्ने अनुमान गरिएको छ। अहिले उक्त स्थानमा थप क्षति नहोस् भनेर ग्यावियन जाली लगाएर अस्थायी रोकथामका उपायहरू गरिएको छ। यो सडकमार्गमा दैनिक १०,००० भन्दा बढी सवारीसाधन सञ्चालन हुन्छन्, जसले काठमाडौँ र पोखरा जोड्ने प्रमुख मार्गको रूपमा महत्त्वपूर्ण भूमिका निर्वाह गर्दछ।
प्रकाशित मिति: १४ जेष्ठ २०८२, बुधबार
प्रतिक्रिया