काठमाडौँ । बलिउडमा आफ्नो अभिनयकला र व्यक्तित्वमार्फत अलग्गै पहिचान बनाएकी चर्चित नेपाली अभिनेत्री मनीषा कोइरालाले नेपालको भविष्य, पहिचान र एकताका लागि संवैधानिक राजतन्त्र आवश्यक रहेको धारणा व्यक्त गरेकी छन्।
सामाजिक सञ्जाल फेसबुकमार्फत एक भावनात्मक र विचारप्रधान पोस्ट साझा गर्दै उनले नेपाललाई शान्तिपूर्ण हिन्दु अधिराज्यको रूपमा पुनःस्थापना गर्नुपर्ने आवश्यकता औँल्याएकी छन्।
उनले लेखेकी छन्, “आजको दिन मेरो लागि गहिरो आत्मचिन्तनको हो — एक नेपाली नागरिकको हैसियतले, जसले देशप्रति गहिरो माया राख्दछ। मलाई लाग्छ, अब भावना होइन, सत्य र इमानदारीका साथ नेपालको दिशाबारे खुला संवाद गर्नु अत्यावश्यक छ।”
मनीषा स्पष्ट रुपमा विश्वास व्यक्त गर्छिन् कि नेपालले विश्वकै एक मात्र शान्तिपूर्ण हिन्दु अधिराज्यको रूपमा आफ्नो मौलिक पहिचान पुनःस्थापित गर्नुपर्छ — जहाँ शासन कुनै बल वा कट्टर सोचले होइन, आध्यात्मिक मूल्य, सांस्कृतिक निरन्तरता र राष्ट्रिय एकताले निर्देशित होस्।
उनको भनाइमा, “संवैधानिक राजतन्त्र राजनीतिक दलहरूभन्दा माथि रहने राष्ट्रिय एकताको प्रतीक बन्न सक्छ, जुन राजनीतिक दलहरूले आफ्नो प्रतिस्पर्धात्मक र विभाजनकारी स्वभावका कारण दिन सक्दैनन्।”
उनले वर्तमान राजनीतिक प्रणाली गहिरो रूपमा भ्रष्टाचारमा डुबेको आरोप लगाउँदै एक गैर-राजनीतिक, स्थायी संस्था आवश्यक भएको बताएकी छन्, जसले जनताको विश्वास, राष्ट्रको मूल्यमान्यता र संस्कृतिको संरक्षण गर्दै सन्तुलनको भूमिकामा काम गर्न सकोस्।
उनको भनाइमा राजतन्त्र हाम्रो सनातन धर्म, इतिहास र परम्परामा गहिरो जरा गाडिएको संस्था हो, जसले हामीलाई हाम्रो मौलिक पहिचान सम्झाउने काम गर्छ।
यस पोस्टमार्फत मनीषाले एक पटक फेरि नेपालमा संवैधानिक राजतन्त्रको औचित्य र आवश्यकता उठान गर्दै समसामयिक राजनीतिक अवस्था प्रति गहिरो चिन्ता व्यक्त गरेकी छन्।
प्रकाशित मिति: १५ जेष्ठ २०८२, बिहिबार
प्रतिक्रिया