काठमाडौं । नेकपा (एमाले) का महासचिव शंकर पोखरेलले पार्टीद्वारा सुरु गरिएको ‘म झोले हुँ’ अभियानप्रति आलोचना गर्नेहरूलाई सामाजिक सञ्जालमार्फत सात बुँदामा स्पष्ट जवाफ दिएका छन्। बुधबार फेसबुकमार्फत सार्वजनिक गरिएको उनको लेखमा पोखरेलले झोला बोकेका एमाले कार्यकर्ता र नेताहरूप्रति उठाइएका प्रश्नहरूको संगठित रूपमा प्रतिवाद गरेका हुन्।
पोखरेलले ‘समृद्ध नेपाल, सुखी नेपाली’ भन्ने राष्ट्रिय लक्ष्य हासिल गर्न एमालेको विचार, कार्यक्रम र कार्यशैली आवश्यक रहेको उल्लेख गर्दै पार्टीको झोला गौरवका साथ बोक्न सबैलाई आह्वान गरेका छन्। उनले प्रतिक्रियावादी शक्तिहरूले एमालेबारे फैलाएका भ्रमबाट समाजलाई मुक्त गर्न अभियानमै जुट्न पनि आग्रह गरे।
झोला भित्र के छ? महासचिव पोखरेलको सात बुँदे उत्तर:
१. मार्क्सवादी दर्शन: द्वन्द्वात्मक भौतिकवाद र ऐतिहासिक भौतिकवादको आधारभूत सिद्धान्त।
२. सिर्जनात्मक जबज: जनताको बहुदलीय जनवाद (जबज) को मौलिक कार्यक्रम र सिद्धान्त, जो मार्क्सवादको नेपाली सन्दर्भमा सृजनात्मक विकास हो।
३. परिपूर्ण लोकतन्त्र: जबजको प्रयोग र विस्तारक्रममा निर्माण भएको समावेशी र उत्तरदायी लोकतान्त्रिक मान्यता।
४. सन्तुलित परराष्ट्र नीति: नेपालको राष्ट्रिय हितमा आधारित असंलग्नता र पञ्चशीलको सिद्धान्तमा आधारित सन्तुलित कूटनीतिक दृष्टिकोण।
५. पार्टीको लोकतान्त्रिक जीवन: जबजको आधारमा पार्टी संगठन र व्यवहारमा लोकतान्त्रिक रूपान्तरणको नयाँ धारा।
६. जनतासँगको सम्बन्ध: जनताको जीवनशैली, संस्कार र आचरणसँग गहिरो सम्बन्धमा आधारित नेताको जीवनपद्धति।
७. समाजवादको नेपाली मार्गचित्र: प्रतिस्पर्धा, पहलकदमी र उत्कृष्टता माथि आधारित नेपाली समाजवाद निर्माणको दिशा।
पोखरेलले आफ्ना विचारमार्फत एमालेको वैचारिक, राजनीतिक र संगठनात्मक यात्रालाई गलत रूपमा चित्रण गर्नेहरूलाई चुनौती दिँदै, पार्टीका कार्यकर्ता र समर्थकहरूलाई झोला बोकेर गर्वका साथ अघि बढ्न आह्वान गरेका छन्।
उनले भने, “आउनुहोस्, समृद्ध नेपाल, सुखी नेपालीको सपना साकार पार्न एमालेको झोला गर्वका साथ बोकौँ। प्रतिक्रियावादी र प्रतिगामी शक्तिहरूले फैलाएका भ्रम चिर्दै समाजलाई सच्चा परिवर्तनको बाटोमा लैजाऔं।”
प्रकाशित मिति: २१ जेष्ठ २०८२, बुधबार
प्रतिक्रिया