काठमाडौं । रुसले युक्रेनमाथि गरेको क्षेप्यास्त्र र ड्रोन आक्रमणमा कम्तीमा ६ जनाको मृत्यु भएको युक्रेनी अधिकारीहरूले जनाएका छन् । तीव्र विस्फोटका आवाजले देशभरि कम्पन सिर्जना गरेको थियो। शुक्रबार बिहानसम्म जारी ती आक्रमणहरू केही दिनअघि युक्रेनी ड्रोन आक्रमणबाट रुसको भित्रिका केही रणनीतिक बमवर्षक विमानहरू ध्वस्त भएपछि रुसका राष्ट्रपति भ्लादिमिर पुटिनले दिएको चेतावनीपछि भएका हुन्।
पुटिनको सन्देश अमेरिकी पूर्वराष्ट्रपति डोनाल्ड ट्रम्पमार्फत् आएको बताइएको छ, जसमा क्रेमलिनले कडा जवाफ दिने चेतावनी दिएको थियो। युक्रेनका राष्ट्रपति भ्लोदिमिर जेलेन्स्कीका अनुसार राजधानी कीएभमा तीन आपतकालीन उद्धारकर्मीहरूको मृत्यु भएको छ। उत्तरी सहर चेर्निहिभमा दुई जनाको मृत्यु भएको छ भने उत्तरपश्चिमी सहर लुत्स्कमा कम्तीमा एक जनाको ज्यान गएको छ।
जेलेन्स्कीले शुक्रबार राति जारी गरेको भिडियो सम्बोधनमा भने, ‘कीएभमा मारिएका उद्धारकर्मीहरू प्रारम्भिक आक्रमणपछि उद्धारका लागि घटनास्थल पुगेका थिए। तर, दोस्रो पटकको रूसी आक्रमणमा परेर उनीहरूको ज्यान गयो।’
कीएभ सहरमा धेरै विस्फोटका आवाजहरू सुनिएको जनाइएको छ। सहरका प्रशासन प्रमुख तिमुर त्काचेनको अनुसार विभिन्न स्थानमा आगलागी समेत भएको छ।
प्रकाशित मिति: २४ जेष्ठ २०८२, शनिबार
प्रतिक्रिया