काठमाडौं । नेकपा (एमाले) का प्रमुख सचेतक महेश बर्तौलाले संसद बैठक दुई दिनपछि सारिनुको कारण प्रतिपक्षी दलकै आग्रह भएको स्पष्ट पारेका छन्।
सोमबार संसद भवन, नयाँ बानेश्वरमा सञ्चारकर्मीहरूसँग कुराकानी गर्दै बर्तौलाले प्रतिपक्षीले सहमतिको प्रयास गर्न मंगलबारसम्म समय मागेपछि बैठक सारिएको जानकारी दिए। उनका अनुसार सत्तापक्ष वार्तामा अधिक लचक भएर अघि बढेको छ।
बर्तौलाले प्रतिपक्षी दलले भिजिट भिसासम्बन्धी मुद्दालाई लिएर सदन अवरुद्ध गरेको भन्दै अब अवरोध हटाउने जिम्मेवारी पनि उनीहरूकै भएको बताए। उनले सहमतिका लागि कुनै औपचारिक लिखित प्रस्तावमा छलफल भने नभएको प्रस्ट पारे।
संवैधानिक आयोगमार्फत भिजिट भिसा प्रकरणमा अनुसन्धान भैरहेको उल्लेख गर्दै बर्तौलाले उक्त निष्कर्ष नआउँदै नयाँ समिति वा आयोग गठन गरेर छानबिन अघि बढाउनु उचित नहुने धारणा व्यक्त गरे।
प्रकाशित मिति: २६ जेष्ठ २०८२, सोमबार
प्रतिक्रिया