काठमाडौं । राष्ट्रिय स्वतन्त्र पार्टी (रास्वपा) का प्रमुख सचेतक सन्तोष परियारले भिजिट भिसा प्रकरणमा आफूहरूले उठाएका मागप्रति सत्तापक्ष गम्भीर नभएको आरोप लगाएका छन्।
सोमबार नयाँ बानेश्वरस्थित संसद भवनमा सञ्चारकर्मीहरूसँग कुरा गर्दै परियारले संसदको गतिरोध अन्त्य गर्ने विषयमा पटक–पटक छलफल भए पनि सत्तापक्षको उदासीनताले सहमतिको वातावरण बन्न नसकेको बताए।
उनका अनुसार भिजिट भिसा प्रकरण कुनै सानो वा सामान्य विषय होइन, त्यसैले छानबिन समिति गठनको प्रस्ताव गरिएको थियो। तर सत्तापक्षले न गृहमन्त्रीको राजीनामा दिन तयार देखिएको छ, न त छानबिन समिति बनाउन इच्छुक देखिएको छ। यस्तो अवस्थामा संवादको औचित्य नरहने उनको तर्क छ।
परियारले सत्तापक्षले विपक्षी दलका मागहरूलाई गम्भीरतापूर्वक सम्बोधन गरे मात्र समस्या समाधानतर्फ उन्मुख हुने स्पष्ट पारे। कांग्रेसका केही नेताहरूले पनि विपक्षीका मागप्रति असहमति जनाएकाले सहमतिको प्रयास निष्फल भएको उनले उल्लेख गरे।
प्रकाशित मिति: २६ जेष्ठ २०८२, सोमबार
प्रतिक्रिया