काठमाडौं । विपक्षी दलहरूको बैठक बस्नुअघि नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ र नेकपा (एकीकृत समाजवादी) का अध्यक्ष माधवकुमार नेपालबीच भेटवार्ता भएको छ। दुवै नेता हाल माओवादी केन्द्रको संसदीय दलको कार्यालयमा छलफलमा छन्।
छलफलमा प्रतिनिधिसभामा जारी अवरोध हटाउने र पछिल्ला समसामयिक राजनीतिक विषयमा कुराकानी भइरहेको छ। यी दुई नेताबीचको छलफलपछि विपक्षी गठबन्धनको बैठक बस्ने तयारी गरिएको छ।
संसद खुलाउने विषयमा माओवादी केन्द्र र नेकपा एस लचक देखिएका छन्। तर राष्ट्रिय स्वतन्त्र पार्टी (रास्वपा) भने गृहमन्त्री नारायणकाजी श्रेष्ठको राजीनामा र आफूले अघि सारेको पाँच बुँदे प्रस्ताव कार्यान्वयन हुनुपर्ने अडानमा कायम छ। आजको बैठकले उक्त विषयमा निर्णायक निर्णय लिने अपेक्षा गरिएको छ।
प्रतिनिधिसभाको बैठक आज दिउँसो ३ बजेका लागि बोलाइएको छ। तर, दलहरूबीच अहिलेसम्म सहमति जुट्न सकेको छैन। सत्ता पक्ष माओवादी केन्द्रले प्रस्तुत गरेको दुई बुँदे प्रस्तावमा केही सहमति देखिएको छ भने रास्वपाले माओवादी पनि आफूहरूको प्रस्तावमा सहमत रहेको दाबी गरिरहेको छ।
प्रकाशित मिति: २९ जेष्ठ २०८२, बिहिबार
प्रतिक्रिया