काठमाडौँ । गृहमन्त्री रमेश लेखकले अनुसन्धानकर्ता प्रहरी र अभियोजनमा संलग्न सरकारी वकिलबीच गहिरो समन्वय आवश्यक रहेको बताएका छन्। शुक्रबार बिहान प्रहरी प्रधान कार्यालयमा आयोजित अनुसन्धानकर्ता प्रहरी तथा सरकारी वकिलहरूको तेस्रो राष्ट्रिय सम्मेलनमा बोल्दै मन्त्री लेखकले अपराध अनुसन्धान र अभियोजन प्रक्रियालाई अझ प्रभावकारी बनाउन निरन्तर सहकार्य अपरिहार्य रहेको बताए।
“सुरक्षा निकायहरू सबैभन्दा बढी जिम्मेवारी बोकेको संस्था हुन्,” मन्त्री लेखकले भने, “तर तिनै निकायहरूले सीमित स्रोत र साधनमै काम गर्नुपरेको छ। यसतर्फ सरकारले आवश्यक ध्यान दिँदै आएको छ र आगामी बजेटमा पनि प्रहरी क्षेत्रको बजेटमा उल्लेखनीय वृद्धि गरिएको छ।”
उनले विज्ञान र प्रविधिको प्रयोग अपराधिक गतिविधिहरूमा समेत भइरहेकाले अनुसन्धान र अभियोजन प्रक्रियामा यिनको अधिकतम सदुपयोग आवश्यक रहेको उल्लेख गरे। “विज्ञानको प्रयोग मानवताविरुद्ध पनि भइरहेकाले हामीले अनुसन्धानको क्रममा यसलाई न्यायोचित ढंगले उपयोग गर्नुपर्ने हुन्छ,” उनले भने।
मन्त्री लेखकले अनुसन्धान र अभियोजन दुवै चरणमा प्रविधिको प्रयोगलाई भरपर्दो र प्रमाणमा आधारित बनाउनु पर्नेमा जोड दिए। “सिर्फ प्रविधि प्रयोग गर्नु पर्याप्त होइन,” उनले भने, “त्यो प्रयोग सही र उद्देश्यअनुकूल हुनुपर्छ। प्रमाण संकलनमा पनि अत्यन्तै सावधानी अपनाइनु आवश्यक छ।”
उनका अनुसार फौजदारी न्याय प्रणालीमा अनुसन्धान र अभियोजन अत्यन्त संवेदनशील तथा महत्वपूर्ण पाटो भएकोले विज्ञान र प्रविधिको प्रयोगले न्यायिक निष्कर्षमा सहयोग पुर्याउने गरी व्यवस्थित ढंगले गरिनु पर्ने आवश्यकता रहेको छ।
गृहमन्त्री लेखकको भनाइले सुरक्षा निकाय र न्याय प्रणालीबीचको सशक्त सहकार्य, आधुनिक प्रविधिको प्रयोग, तथा प्रमाण आधारित अनुसन्धान प्रणालीको आवश्यकता प्रतिविम्बित गर्छ।
प्रकाशित मिति: ३० जेष्ठ २०८२, शुक्रबार
प्रतिक्रिया