काठमाडौं । संसद्को बैठकमा राष्ट्रिय स्वतन्त्र पार्टी (रास्वपा)का सांसदहरूले देखाएको विरोधको शैलीप्रति सत्तारुढ नेकपा एमालेका सांसद दामोदर बैरागीले आपत्ति जनाएका छन्।
प्रतिनिधिसभाको सोमबारको बैठकमा नियमावलीको उल्लंघन भएको भन्दै उनले सभामुखको ध्यानाकर्षण गराए। बैरागीले रास्वपा सांसदहरूले सभामुखको आसनअगाडि जुत्ता–चप्पल खोलेर ध्यान गरेजस्तो आसनमा बसेको शैलीलाई असान्दर्भिक र असंवैधानिक भने।
उनले भने, “सभामुखको ड्यासतर्फ, सभामुखको आसनतर्फ जुत्ता–चप्पल खोलेर ध्यान गरेजस्तो गरेर विरोध जनाउनु संसदीय मर्यादाविपरीत हो। यस्तो कार्यले संसद्को गरिमा घटाउँछ। म सम्माननीय सभामुखज्यूको ध्यान उक्त व्यवहारप्रति आकृष्ट गराउन चाहन्छु।”
उनले संसदीय मर्यादा र आचरणको रक्षा गर्न सबै दल र सांसदहरूको जिम्मेवारी रहेको पनि स्मरण गराए।
प्रकाशित मिति: २ असार २०८२, सोमबार
प्रतिक्रिया