काठमाडौं । अमेरिकी राष्ट्रपति डोनाल्ड ट्रम्पले इजरायल–इरानबीचको युद्धविराम कार्यान्वयन नहुनुमा गहिरो असन्तुष्टि व्यक्त गरेका छन्। मंगलबार उनले इजरायल र इरान दुवैलाई युद्धविरामको पालना गर्न कडा चेतावनी दिँदै तत्काल सैन्य कारबाही रोक्न आग्रह गरे।
ट्रम्पले हालैको युद्धविराम उल्लंघनप्रति आक्रोश व्यक्त गर्दै भने, “दुवै पक्षले युद्धविरामको सम्मान गर्नैपर्छ। यदि यो रोकिने होइन भने, म के गर्न सक्छु, त्यो हेर्न बाँकी छ।” उनले यो भनाइ वासिङ्टन डीसीमा पत्रकारहरूसँगको संक्षिप्त कुराकानीका क्रममा राखेका थिए।
ट्रम्पले आफ्नो सामाजिक सञ्जाल ‘ट्रुथ सोसल’मा लेख्दै इजरायलप्रति लक्षित गर्दै भने, “बम नझार! र आफ्ना पाइलटहरू तुरुन्त घर फर्काऊ।” तर उनले युद्धविराम तोड्ने पक्षबारे स्पष्ट रूपमा नाम भने लिएनन्।
इजरायली सेनाले युद्धविरामपछि इरानले मिसाइल आक्रमण गरेको आरोप लगाएको छ भने इरानी सेनाले यस्तो दाबी अस्वीकार गर्दै आक्रमणको खण्डन गरेको छ।
यदि युद्धविराम पूर्ण रूपमा लागू भयो भने, पछिल्ला १२ दिनदेखि जारी हिंसात्मक संघर्ष अन्त्य हुनेछ। यस द्वन्द्वमा अमेरिका पनि सक्रिय रूपमा संलग्न रहेको थियो। ट्रम्पले इरानका आणविक साइटहरूमा आक्रमण गर्न अमेरिकी सेनालाई आदेश दिएका थिए, जसको जवाफमा इरानले कतारस्थित अमेरिकी सैन्य बेसमा मिसाइल आक्रमण गरेको थियो।
युद्धविरामसम्बन्धी घोषणा ट्रम्पले सोमबार गरेका थिए, जसले ट्रम्प प्रशासनभित्रका केही अधिकारीहरूलाई समेत चकित बनाएको थियो। नाटो सम्मेलनमा सहभागी हुन नेदरल्यान्ड्स प्रस्थान गर्नुअघि पत्रकारहरूसँग कुराकानी गर्दै ट्रम्पले युद्धविरामको कार्यान्वयन अपरिहार्य भएको बताएका छन्।
प्रकाशित मिति: १० असार २०८२, मंगलबार
प्रतिक्रिया