काठमाडौं । आफू राष्ट्रिय स्वतन्त्र पार्टी (रास्वपा)को महामन्त्री रहेको दाबी गर्दै डा. मुकुल ढकालले सर्वोच्च अदालतमा रिट दायर गरेका छन्। उनले बुधबार दायर गरेको रिटमा बिहीबार सुनुवाइको मिति तोकिएको छ।
उक्त रिट बिहीबार न्यायाधीश कुमार रेग्मीको इजलासमा सुनुवाइका लागि तोकिएको हो। डा. ढकालको मुद्दा रेग्मीको इजलासको छैटौं नम्बरमा रहेको छ।
रास्वपाका संस्थापक महामन्त्री डा. ढकाललाई पार्टीले देशभर घुमेर तयार पारेको रिपोर्ट सार्वजनिक गरेको भन्दै अनुशासन उल्लंघनको आरोपमा कारबाही गरेको थियो। उक्त कारबाहीविरुद्ध उनी निर्वाचन आयोग पुगेका थिए।
निर्वाचन आयोगले नयाँ कार्यसमितिबारे आधिकारिक जानकारी नआएको जनाउँदै ढकाललाई वैधता दिएको थियो। सोही वैधता आधार बनाएर उनले आफू अझै पनि रास्वपाको महामन्त्री भएको दाबी गर्दै सर्वोच्चमा न्याय मागेका हुन्।
प्रकाशित मिति: १२ असार २०८२, बिहिबार
प्रतिक्रिया