काठमाडौं । एयर इन्डिया दुर्घटनाको अनुसन्धानका लागि भारतले राष्ट्रसंघीय उड्डयन अनुसन्धानकर्तालाई संलग्न गर्न अस्वीकार गरेको छ ।
भारतले संयुक्त राष्ट्रसंघको एक अनुसन्धानकर्तालाई जुन १२ मा भारतको अहमदाबादमा २६० जनाको मृत्यु हुनेगरी भएको एयर इन्डिया जेट दुर्घटनाको जाँचमा सहभागी हुन अनुमति नदिएको समाचार संस्था रोयटर्सले जनाएको छ । यसअघि यसको ब्ल्याक बक्स डेटाको विश्लेषणमा ढिलाइ भएको भन्दै केही सुरक्षा विशेषज्ञहरूले आलोचना गरेका थिए ।
यो हप्ताको सुरुमा संयुक्त राष्ट्रसंघको उड्डयन निकायले असामान्य कदम चाल्दै भारतलाई बोइङ ७८७–८ ड्रिमलाइनर दुर्घटनाको अनुसन्धानमा सहयोग गर्न आफ्नो एक अनुसन्धानकर्ता उपलब्ध गराउने प्रस्ताव गरेको थियो ।
यसअघि, अन्तर्राष्ट्रिय नागरिक उड्डयन संगठन आईसीएओ ले २०१४ मा मलेसियाली विमान खसालिएको र २०२० मा युक्रेनी जेटलाइनरको जाँचमा सहयोग गर्न अनुसन्धानकर्ताहरू खटाएको थियो । तर, त्यो समय संगठनलाई सहयोगको लागि अनुरोध गरिएको थियो ।
आईसीएओले भारतमा रहेका अनुसन्धानकर्तालाई पर्यवेक्षकको हैसियत दिन अनुरोध गरेको थियो । तर, भारतीय अधिकारीहरूले यो प्रस्ताव अस्वीकार गरेको स्रोतहरूले रोयटर्सलाई बताएका छन् ।
विश्वको एक दशककै सबैभन्दा घातक उड्डयन दुर्घटनाको जाँच गरिरहेको भारतको विमान दुर्घटना अनुसन्धान ब्यूरोले यो विषयमा टिप्पणीको लागि अनुरोध गर्दा जवाफ दिएन ।
भारतको नागरिक उड्डयन मन्त्रालयले बिहीबार बताएअनुसार अनुसन्धानकर्ताहरूले दुर्घटनाको लगभग दुई हप्तापछि फ्लाइट रेकर्डर डेटा डाउनलोड गरेका थिए ।
यसअघि, सुरक्षा विशेषज्ञहरूले जाँचको बारेमा जानकारीको अभाव, जुन १३ मा प्राप्त ब्ल्याक बक्स र जुन १६ मा फेला परेको दोस्रो सेटको अवस्थाबारे प्रश्न उठाएका थिए ।
भारतको राष्ट्रिय यातायात सुरक्षा बोर्ड अनुसन्धानमा सहभागी भएकाले रेकर्डरहरू भारतमा वा अमेरिकामा खोलिने भन्ने प्रश्न पनि उठेको थियो । भारत सरकारले यो घटनामा केवल एक पत्रकार सम्मेलन गरेको थियो ।
यो हप्ताको सुरुमा नाम नखुलाउने सर्तमा एक भारतीय उड्डयन मन्त्रालयका अधिकारीले मन्त्रालयले आईसीएओका सबै प्रोटोकलहरू पालना गरिरहेको भनेका थिए । उनले मिडिया प्रतिनिधिहरूले महत्वपूर्ण घटनाहरूमा अद्यावधिक गरेका पनि बताए ।
धेरैजसो हवाई दुर्घटनाहरू एकभन्दा बढी कारकहरूले हुने गर्छन् । सामान्यतः दुर्घटना भएको लगभग ३० दिनपछि प्रारम्भिक प्रतिवेदन प्राप्त हुने गरेको छ । रोयटर्स
प्रकाशित मिति: १३ असार २०८२, शुक्रबार
प्रतिक्रिया