नेपाली महिला फुटबल टोलीको ऐतिहासिक यात्रा आजबाट सुरु हुँदै, पहिलो खेल लाओससँग

काठमाडौँ । चार दशक लामो अन्तर्राष्ट्रिय यात्रा, सयौं खेलको अनुभव, र अब एउटै लक्ष्य  नेपाली महिला फुटबल टोली आजबाट एएफसी महिला एसियन कप छनोटको अभियान सुरु गर्दैछ, जहाँ पहिलो खेल लाओससँग हुँदैछ ।

समूह ‘एफ’ मा रहेको नेपालले आयोजक उज्वेकिस्तान, लाओस र श्रीलंकासँग प्रतिस्पर्धा गर्नुपर्नेछ। तर पहिलो बाधा लाओस हो । जससँग नेपालको यो पहिलो भेट हो। तास्केन्तको बुनयोदकोर स्टेडियममा साँझ ६ बजे हुने खेल नेपाली टोलीका लागि एउटा नयाँ अध्यायको सुरुवात हो।

इतिहासको १००औं खेल, नयाँ प्रशिक्षकको डेब्यू, यो खेल नेपाली महिला फुटबलको अन्तर्राष्ट्रिय इतिहासमा १००औं खेल हुनेछ । जुन आफैंमा एउटा उपलब्धि हो। नेपाली महिला टोलीले चार दशकअघि पहिलोपटक अन्तर्राष्ट्रिय खेल खेल्दा सायद कसैले सोचेका थिएनन्, एक दिन यस्तो मञ्चमा उत्रनेछ।

त्यो ऐतिहासिक क्षणलाई नेतृत्व गर्दै छन् । बेल्जियमका प्याट्रिक डे वाइल्ड। उनी नेपाली महिला टोलीका पहिलो विदेशी प्रशिक्षक हुन् र आजकै खेलबाट आफ्नो कार्यकाल सुरु गर्दैछन्। शनिबार आयोजित पत्रकार सम्मेलनमा उनले भने, “हामी शारीरिक र मानसिक रूपले तयार छौँ। प्रतिस्पर्धा भनेको सुन्दर चुनौती हो, र हामी त्यसका लागि मैदानमा उत्रिनेछौँ।”

समूह ‘एफ’ बाट सिर्फ एक टोली मात्र एशियन कपको अर्को चरणमा पुग्नेछ। उज्वेकिस्तान फिफा वरियतामा अगाडि भए पनि नेपाललाई त्यहाँसम्म पुग्न सक्ने दावेदार मानिएको छ। नेपाल हाल फिफा वरियतामा १००औं स्थानमा छ भने लाओस १०७औं स्थानमा।

नेपालले यही प्रतियोगिताको तयारीस्वरूप थाइल्याण्डजस्तो बलियो टोलीसँग मैत्रीपूर्ण खेल खेलेको थियो, जसले टोलीलाई अन्तर्राष्ट्रिय अनुभव दिलाएको छ। यता लाओसको अन्तर्राष्ट्रिय प्रतिस्पर्धा सिमित छ, जसले नेपाललाई केही मनोवैज्ञानिक बढाइ चढाइ दिन सक्छ।

नेपालको समूहमा आजै अर्को खेल उज्वेकिस्तान र श्रीलंका बीच हुनेछ। उज्वेकिस्तानको घरेलु समर्थन र उच्च वरियताले उनलाई समूहको बलियो टोली बनाएको छ। तर प्रतियोगिता एक खेलमा मात्र हैन, निरन्तरता र रणनीतिमा निर्भर हुन्छ र नेपाल त्यसका लागि तयार देखिन्छ।

यो साँझको खेल नेपाली महिला फुटबलका लागि केवल एक प्रतिस्पर्धा मात्र होइन — यो भविष्यको ढोका हो, जुन जितका साथ खुल्न सक्छ।

प्रकाशित मिति: १५ असार २०८२, आइतबार