काठमाडौं । त्रिभुवन अन्तर्राष्ट्रिय विमानस्थलभित्र सिनामङ्गलमा रहेको हवाई इन्धन डिपो स्थानान्तरणमा ढिलाइ भएको छ ।
मन्त्रीपरिषद्को २०८१ साउन २८ गतेको बैठकले त्रिभुवन अन्तर्राष्ट्रिय विमानस्थलनजिक सिनामङ्गलमा रहेको नेपाल आयल निगमको इन्धन भण्डारण डिपोलाई सुरक्षित र सुविधायुक्त स्थानमा स्थानान्तरण गर्ने निर्णय भएको थियो ।
प्रधानमन्त्री केपी शर्मा ओलीले विमानस्थलको धावनमार्गनजिक रहेको असुरक्षित डिपो अन्यत्र स्थानान्तरण गर्न १८ साउनमा उद्योग, वाणिज्य तथा आपूर्तिमन्त्री दामोदर भण्डारीलाई निर्देशन दिएका थिए ।
सौर्य एयरलाइन्सको विमान साउन ९ गते विमानस्थल परिसरमै दुर्घटना भएपछि असुरक्षित डिपोका कारण अझ ठुलो सम्भावित दुर्घटना रोक्न तत्काल डिपो सार्न प्रधानमन्त्रीको निर्देशन भएको थियो । प्राधिकरणका अनुसार आइकाओको मापदण्ड अनुसार धावनमार्गबाट कम्तीमा ९० मिटर टाढा इन्धन भण्डारण हुनुपर्ने हो तर हाल रहेको भण्डारण धावनमार्गबाट ८० मिटरभित्रै छ ।
डिपो स्थानान्तरण गर्ने निर्णय भएको झन्डै एक वर्ष बित्न लाग्दा पनि प्रक्रिया अगाडि बढ्न सकेको छैन । नेपाल नागरिक उड्डयन प्राधिकरणले जग्गा हस्तान्तरण नगर्दा प्रक्रिया अगाडि बढ्न नसकेको नेपाल आयल निगम हवाई इन्धन डिपो कार्यालय सिनामङ्गलले जनाएको छ ।
प्रकाशित मिति: १६ असार २०८२, सोमबार
प्रतिक्रिया