काठमाडौं । संघीय निजामती सेवा विधेयकमा ‘कुलिङ पिरियड’ सम्बन्धी प्रावधानमा सहमति बाहिरको शब्द थपिएपछि विवाद उत्पन्न भएको छ । उक्त विषयमा स्पष्टता ल्याउन प्रतिनिधिसभाका सभामुख देवराज घिमिरेले राज्य व्यवस्था तथा सुशासन समिति सभापति रामहरि खतिवडा र समिति सचिव सुरजकुमार दुरालाई छलफलका लागि बोलाएका छन् ।
सभामुखका प्रेस सल्लाहकार शेखर अधिकारीका अनुसार छलफलका लागि मंगलबार बिहान १०:३० बजे समय तय गरिएको छ ।
समितिबाट सर्वसम्मत पारित प्रतिवेदनमा “सरकारी सेवाबाट राजीनामा वा अवकाश लिएको मितिले कम्तीमा दुई वर्ष नबितेसम्म कुनै पनि सरकारी पदमा पुन: नियुक्ति दिन नपाइने” भन्ने स्पष्ट व्यवस्था गरिएको थियो । तर, प्रतिनिधिसभामा पारित विधेयकमा ‘बाहेक’ भन्ने शब्द जोडिएपछि मूल मस्यौदामा हस्तक्षेप भएको भन्दै चासो व्यक्त गरिएको छ ।
नेपाली कांग्रेसकी सांसद तथा समितिकी सदस्य सरिता प्रसाईंले पनि विधेयक संसद्बाट पारित हुने क्रममा समितिले पारित गरेको भन्दा फरक शब्द प्रयोग भएको भन्दै सभामुखसँग भेट गर्ने तयारी भइरहेको जानकारी दिइन् ।
विधेयकमा भएको संशोधनप्रति संसदभित्रकै केही नेताहरूले गम्भीर आपत्ति जनाएका छन् । उनीहरूका अनुसार समितिको निर्णय विपरीत विधेयक पास हुनु संसदीय प्रक्रियाको उल्लङ्घन हो ।
यस विषयमा थप छलफलपछि मात्र यथार्थबारे स्पष्ट हुने अपेक्षा गरिएको छ।
प्रकाशित मिति: १७ असार २०८२, मंगलबार
प्रतिक्रिया