रौतहट । रौतहटको फतुवा विजयपुर नगरपालिका–२, शितलपुरमा बिहीबार बिहान करेन्ट लागेर एक युवकको मृत्यु भएको छ।
स्थानीय ३० वर्षीय रोहित साह सोनार बिहान करिब ७ः१५ बजे आफ्नै खेतमा सिँचाइका लागि मोटर चलाउने क्रममा करेन्ट लागेर गम्भीर घाइते भएका थिए।
घटनाको जानकारी पाउनेबित्तिकै इलाका प्रहरी कार्यालय सन्तपुर दोस्तियाबाट सई गजेन्द्र कुमारको नेतृत्वमा प्रहरी टोली घटनास्थलतर्फ खटिएको थियो।
गम्भीर अवस्थामा रहेका रोहितलाई तत्कालै उपचारका लागि प्रादेशिक अस्पताल, कलैया (बारा) लगिएको थियो। तर, उपचारकै क्रममा बिहान ८ः०० बजे उनको मृत्यु भएको रौतहट जिल्ला प्रहरी कार्यालयका प्रवक्ता डीएसपी दीपक कुमार रायले जानकारी दिए।
हाल मृतकको शव पोस्टमार्टमका लागि प्रादेशिक अस्पताल, कलैयामै राखिएको छ।
घटना स्थल इलाका प्रहरी कार्यालय सन्तपुर दोस्तियाबाट करिब ५ किलोमिटर दक्षिणमा पर्छ। घटनाबारे प्रहरीले थप अनुसन्धान अगाडि बढाएको जनाएको छ।
प्रकाशित मिति: १९ असार २०८२, बिहिबार
प्रतिक्रिया