काठमाडौं । प्रतिनिधिसभा सदस्य अमरेशकुमार सिंहले आम्दानीको सम्भावना नभएका क्षेत्रमा लगानी गर्नु अर्थहीन हुने टिप्पणी गरेका छन्।
सिंहदरबारमा आज बसेको प्रतिनिधिसभाको अन्तर्राष्ट्रिय सम्बन्ध तथा पर्यटन समितिको बैठकमा बोल्दै उनले वैदेशिक ऋण लिई आम्दानी नहुने परियोजनामा खर्च गर्नु राष्ट्रिय हितविपरीत हुने बताएका हुन्।
उनले जनसंख्याको घनत्वलाई आधार मानेर भौतिक पूर्वाधार निर्माण गर्नु उपयुक्त हुने सुझाव दिए। भैरहवा र पोखरामा निर्माण भएका अन्तर्राष्ट्रिय विमानस्थलहरू लागतिलो भए पनि प्रयोजनहीन बनेको भन्दै उनले सरकारको ध्यानाकर्षण गराए।
“भैरहवा र पोखराका विमानस्थलहरू सञ्चालनमा नआउनु गम्भीर विषय हो,” उनले भने, “यस्ता परियोजनामा देखिएका अनियमितता छानबिन हुनुपर्छ।”
सिंहले वैदेशिक ऋणको दुरुपयोग गर्दै भ्रष्टाचारका निम्ति आयोजना अघि बढाउने प्रवृत्तिको कडा आलोचना गरे।
उनको भनाइमा, “जहाँ नागरिकको घनत्व बढी छ, त्यहाँ पूर्वाधार निर्माण गर्दा त्यसको सदुपयोग बढी हुन्छ। तर हाल उल्टो ढंगले योजना बनाउने प्रवृत्ति देखिएको छ, जसले स्रोतको अपव्यय मात्र गरिरहेको छ।”
प्रकाशित मिति: २२ असार २०८२, आइतबार
प्रतिक्रिया