कैलाली । सुदूरपश्चिम प्रदेशका मुख्यमन्त्री कमल बहादुर शाह शनिबार नाउपा (नागरिक उन्मुक्ति पार्टी) का संरक्षक रेशम चौधरीको बर्दियास्थित निवास पुगे । कांग्रेस सभापति शेरबहादुर देउवाको सन्देश बोकेर पुगेका शाहले चौधरीसँग करिब एक घण्टा छलफल गरेका हुन् ।
गत बिहीबार शाहले नाउपाका उद्योग, पर्यटन, वन तथा वातावरण मन्त्री रामेश्वर चौधरीलाई पदमुक्त गरेपछि नाउपा आक्रोशित भएको थियो । त्यसको भोलिपल्ट, शुक्रबार, नाउपाले सुदूरपश्चिम प्रदेश सरकारलाई दिएको समर्थन फिर्ता लिए; शनिबार उसले सङ्घीय सत्ता गठबन्धनबाटसमेत बाहिरिने निर्णय गर्याे । यही पृष्ठभूमिमा देउवाको पहलमा शाह–चौधरी भेट भएको हो ।
मुख्यमन्त्री शाहले “प्रदेश सरकारको स्थायित्व र विकासका लागि फेरि सहकार्यमा आउनुस्” भन्ने देउवाको प्रस्ताव सुनाए । तर चौधरीले पार्टीले प्रतिपक्षमा बस्ने निर्णय गरिसकेको बताउँदै, “अब सत्ता समीकरणबारे छलफल केन्द्रमै हुन्छ,” भन्ने जवाफ दिए ।
यसअघि शनिबार बिहानै बूढानीलकण्ठमा देउवा र शाहबीच छुट्टै परामर्श भएको थियो । देउवाले चौधरीसँग प्रत्यक्ष संवाद गर्न सुझाएको केही घण्टापछि बर्दियामा भेट सम्पन्न भयो ।
प्रदेशसभामा कुल ५३ सिट छन् । कांग्रेस (१८) र माओवादी (११) सहितको सत्तापक्षसँग नाउपाका ७ सिट जोडिँदा सहज बहुमत थियो । नाउपाको समर्थन फिर्तापछि शाह नेतृत्वको सरकार अल्पमतमा पर्ने सम्भावना बलियो बनेको छ, जसले सुदूरपश्चिममा नयाँ सत्ता गणितको बहस तातेको छ ।
प्रकाशित मिति: २२ असार २०८२, आइतबार
प्रतिक्रिया