काठमाडौं । नेपाल राष्ट्र बैंकले सेयर धितो राखेर व्यक्तिले लिन सक्ने कर्जाको सीमा बढाएको छ। अबदेखि व्यक्तिगत रूपमा २५ करोड रुपैयाँसम्म सेयर धितो कर्जा लिन सकिनेछ।
गभर्नर विश्वनाथ पौडेलले आगामी आर्थिक वर्ष २०८२/८३ को मौद्रिक नीति सार्वजनिक गर्दै सेयर धितो कर्जामा लाग्ने सीमा वृद्धिको घोषणा गरेका हुन्।
यसअघि एक व्यक्तिले अधिकतम १५ करोड रुपैयाँसम्म मात्र कर्जा लिन पाउने व्यवस्था थियो। अब उक्त सीमा १० करोडले बढाएर २५ करोड रुपैयाँ पुर्याइएको हो।
धितो राखिने सेयरको पछिल्लो १८० दिनको औसत मूल्य वा पछिल्लो बजार मूल्य — जुन कम छ, त्यसको ७० प्रतिशतसम्म कर्जा लिन सकिन्छ।
नेपाल राष्ट्र बैंकका अनुसार जेठ मसान्तसम्म सेयर धितोमा १ खर्ब २८ अर्ब रुपैयाँ बराबरको कर्जा प्रवाह भइसकेको छ।
नयाँ मौद्रिक नीतिसँगै सेयर बजारमा थप पूँजी प्रवाह हुने अपेक्षा गरिएको छ, जसले लगानीकर्तालाई सहजता दिने विश्वास गरिएको छ।
प्रकाशित मिति: २७ असार २०८२, शुक्रबार
प्रतिक्रिया