काठमाडौं । राष्ट्रिय परीक्षा बोर्डले कक्षा १२ को परीक्षा परिणाम साउनको अन्तिम साता सार्वजनिक गर्ने तयारी गरेको छ ।
परीक्षा नियन्त्रण कार्यालयका अनुसार १५ साउनभित्र नतिजा सार्वजनिक गर्ने वार्षिक कार्यतालिका भए पनि शिक्षकहरूको लामो आन्दोलनका कारण परिणाम सार्वजनिक केही ढिलो हुने भएको हो ।
यस वर्षको कक्षा १२ को परीक्षा गत ११ वैशाखदेखि सुरु हुने तालिका थियो । तर, आन्दोलनका कारण परीक्षा १० दिनपछि अर्थात् २१ वैशाखदेखि मात्रै सुरु भएको थियो ।
परीक्षा नियन्त्रक कृष्णप्रसाद शर्माका अनुसार उत्तरपुस्तिका मूल्याङ्कन सकिएको छ भने अहिले नतिजा इन्ट्रीको काम तीव्र गतिमा भइरहेको छ । ‘अब इन्ट्री र भेरिफिकेसनको काम बाँकी छ, साउनको अन्तिम साता नतिजा सार्वजनिक गर्ने लक्ष्यसहित तयारी अघि बढेको छ,’ उनले भने ।
बोर्डका अनुसार यसपटक देशभरबाट कूल ५ लाख ११ हजार ५२५ जना विद्यार्थी परीक्षामा सहभागी भएका थिए ।
प्रकाशित मिति: ५ श्रावण २०८२, सोमबार
प्रतिक्रिया