काठमाडौं । नेकपा माओवादी केन्द्रका अध्यक्ष तथा प्रधानमन्त्री पुष्पकमल दाहाल ‘प्रचण्ड’ले गणतन्त्रको रक्षाप्रति सबैभन्दा गहिरो चिन्ता आफूहरूलाई रहेको बताएका छन्।
बुधबार काठमाडौंमा आयोजित ‘गणतन्त्र अगाडि र पछाडिको नेपाल : तुलनात्मक अध्ययन’ नामक पुस्तक लोकार्पण कार्यक्रममा बोल्दै अध्यक्ष प्रचण्डले गणतन्त्र स्थापना र संस्थागतकरणमा आफ्नो नेतृत्वको ऐतिहासिक भूमिका रहेको उल्लेख गर्दै त्यसलाई उल्ट्याउने प्रयास अस्वीकार्य हुने चेतावनी दिए।
“हामीले रगत, पसिना बगाएर ल्याएको परिवर्तनमाथि प्रश्न उठ्दा हामी चुप लाग्दैनौं,” उनले भने, “अभियान चलिरहेकै बेला गणतन्त्रमाथि प्रश्न उठेपछि काठमाडौंमा विशाल प्रदर्शन त्यत्तिकै गरेका होइनौं।”
अध्यक्ष प्रचण्डले महिला, दलित, आदिवासी, जनजाति लगायतका समुदायले पाएको अधिकार प्राप्तिमा माओवादी आन्दोलनको भूमिका निर्णायक रहेको दाबी गर्दै ती अधिकारहरू अब उल्ट्याउन नसकिने बताए।
उनले महिलाहरूको राजनीतिमा बढ्दो उपस्थितिलाई उदाहरण दिँदै भनिन्, “महिलाहरू जुनसुकै पार्टीबाट आए पनि मलाई गर्व लाग्छ। चाहे उनीहरू एमाले, कांग्रेस वा अन्य दलबाट किन नहून्—हामीले सुरु गरेको विद्रोहले नै यो सम्भव बनाएको हो।”
कार्यक्रममा उनले गणतन्त्रको औचित्य पुष्टि हुँदै गएको र त्यसलाई थप संस्थागत गर्न सबै पक्ष एकजुट हुनुपर्नेमा पनि जोड दिए।
प्रकाशित मिति: ७ श्रावण २०८२, बुधबार
प्रतिक्रिया