काठमाडौं । नेकपा (एकीकृत समाजवादी)का अध्यक्ष माधवकुमार नेपालले पूर्वराष्ट्रपति विद्यादेवी भण्डारीलाई सक्रिय राजनीतिमा फर्किन नदिने प्रवृत्तिको आलोचना गरेका छन्। बुधबार काठमाडौंमा आयोजित एक कार्यक्रममा बोल्दै उनले यस्ता प्रवृत्तिहरू लोकतान्त्रिक अभ्यासविपरीत रहेको बताए।
नेपालले सिधै नाम नलिए पनि एमाले अध्यक्ष केपी शर्मा ओलीप्रति संकेत गर्दै, “कसैले पार्टीमा आउँदा आफ्नो नेतृत्व गुम्ला भन्ने डरले प्रवेश निषेध गर्नु अहिले पनि कतिपय राजनीतिक वृत्तमा देखिन्छ,” भन्दै यस्तो मानसिकता त्याग्न आग्रह गरे। उनले थपे, “मैले सबैलाई भनेको होइन, नाम लिन चाहन्नँ, तर यस्तो प्रवृत्ति राम्रो होइन।”
उनले कम्युनिष्ट नेताहरूको सक्रियता अहिलेको परिस्थितिमा अपरिहार्य भएको उल्लेख गरे। कम्युनिष्टहरू थुप्रै गुटमा विभाजित भइसकेको भन्दै उनले ती सबै गुटहरूबीच संवाद र समन्वयमार्फत एकतामा पुग्नुपर्नेमा जोड दिए।
“अलग-अलग पसल खोलेर बस्नु भन्दा सबै मिलेर एउटै ढोकाबाट अगाडि बढ्नु आजको आवश्यकता हो। आपसी छलफलबाट धेरै समस्या समाधान गर्न सकिन्छ,” अध्यक्ष नेपालले भने।
उनको धारणा अनुसार, कम्युनिष्ट आन्दोलनलाई सशक्त बनाउनका लागि पार्टीभित्र बहस, छलफल र सहभागीहरूको संख्या बढाउनु आवश्यक छ। “पार्टीमा जति धेरै सक्रिय सदस्य रहनेछन्, आन्दोलन उति नै बलियो र प्रभावकारी हुनेछ,” उनले उल्लेख गरे।
नेपालले राजनीतिक रूपमा खुला वातावरण र विचारको आदानप्रदानलाई लोकतन्त्रको आधार मानेर सबै पक्षलाई समेट्दै अघि बढ्नुपर्ने धारणा व्यक्त गरे।
प्रकाशित मिति: ७ श्रावण २०८२, बुधबार
प्रतिक्रिया