काठमाडौं । नेपाली कांग्रेसका वरिष्ठ नेता तथा राष्ट्रिय सभा सदस्य कृष्णप्रसाद सिटौलाले पार्टीको १४औं महाधिवेशन आगामी २०८३ सालको मंसिरभित्र सम्पन्न हुने दाबी गरेका छन्।
आइतबार काठमाडौंमा आयोजित पत्रकार सम्मेलनमा बोल्दै सिटौलाले नेपाली कांग्रेसको चार वर्षे कार्यकाल यसै मंसिरमा समाप्त हुँदैछ र त्यसपछि एक वर्ष म्याद थप्न सकिने संवैधानिक व्यवस्था अनुसार प्रक्रिया अघि बढ्ने स्पष्ट पारे।
“कांग्रेसको महाधिवेशन चार वर्षमा कहिल्यै सम्पन्न भएको छैन। तर, यसपटक २०८३ सालको दशैंको आसपासमा महाधिवेशन हुने सम्भावना प्रबल छ,” सिटौलाले भने, “हालैभित्र महाधिवेशन हुने चर्चा यथार्थमा टेकेको छैन।”
उनले क्रियाशील सदस्य नवीकरणको काम अझै टुंगिन बाँकी रहेको जनाउँदै असोज मसान्तभित्र त्यसलाई पूरा गर्नुपर्ने आवश्यकता औंल्याए। “क्रियाशील सदस्यता अझै फाइनल भएको छैन। यस्तो अवस्थामा मंसिरमै महाधिवेशन हुने सम्भावना छैन,” सिटौलाको भनाइ थियो।
तर उनले मंसिरपछि भने महाधिवेशन धकेल्न नहुने धारणा राखे। “चार वर्षको अवधि यही मंसिरमा सकिँदैछ। त्यसपछि थपिएको एक वर्षभित्र महाधिवेशन नगरे कांग्रेस विधान विपरीत हुन्छ,” उनले चेतावनी दिए।
उनको भनाइ अनुसार, कांग्रेस महाधिवेशनका लागि आवश्यक तयारीहरू—क्रियाशील सदस्य नवीकरण, समिति पुनर्गठन, संगठनात्मक समायोजन—असोज मसान्तसम्म सकिने गरी काम भइरहेको छ।
“अहिले महाधिवेशन हुने चर्चा भ्रम हो,” सिटौलाले निष्कर्ष निकाल्दै भने, “तर मंसिरपछि पनि ढिलो गर्नु कांग्रेसका लागि राजनीतिक र नैतिक दुबै दृष्टिले क्षतिको विषय हुनेछ।”
Ask ChatGPT
प्रकाशित मिति: ११ श्रावण २०८२, आइतबार
प्रतिक्रिया