काठमाडौं । नागरिक उन्मुक्ति पार्टी (नाउपा)ले पार्टी अध्यक्ष रञ्जिता श्रेष्ठलाई पदबाट हटाउने प्रस्ताव पारित गरेको छ।
बुधबार बसेको नाउपाको राष्ट्रिय भेलाले श्रेष्ठलाई अध्यक्ष पदबाट हटाउने निर्णय गरेको हो। नाउपाका एक नेताका अनुसार भेलाले बहुमतले प्रस्ताव पारित गरेको हो। अहिले कार्यवाहक अध्यक्ष कसलाई बनाउने भन्नेबारे छलफल जारी रहेको जानकारी उनले अन्नपूर्ण पोस्टलाई दिएका छन्।
यसअघि रञ्जिता श्रेष्ठले आफू निकट मानिएका वरिष्ठ उपाध्यक्ष शिव बास्तोलालाई कार्यवाहक अध्यक्षको जिम्मेवारी तोकेकी थिइन्। तर घुस प्रकरणमा उनको नाम मुछिएपछि उनले पार्टी अध्यक्ष पदबाट राजीनामा दिएकी थिइन्।
नाउपाभित्र पछिल्लो समय नेतृत्व परिवर्तनको बहस तीव्र बन्दै गएको थियो। राष्ट्रिय भेलाले अब नयाँ नेतृत्व चयनतर्फ प्रक्रिया अघि बढाउने तयारी गरेको जनाइएको छ।
प्रकाशित मिति: १४ श्रावण २०८२, बुधबार
प्रतिक्रिया