काठमाडौं । प्रधानमन्त्री केपी शर्मा ओलीले साउन १६ गते मनाइने राष्ट्रिय कोदो दिवसको अवसरमा शुभकामना व्यक्त गर्दै कोदो उत्पादन वृद्धिको लागि आह्वान गरेका छन्। साथै, उनले कोदोका परिकारहरूलाई दैनिक भोजनमा समावेश गर्न आग्रह गरेका छन्।
शुक्रबार सामाजिक सञ्जाल फेसबुकमार्फत शुभकामना सन्देश दिँदै प्रधानमन्त्री ओलीले कोदो नेपालीको परम्परागत खाद्यान्नमात्र नभई, उच्च पोषणयुक्त गुण भएको अन्न भएको उल्लेख गरेका छन्।
उनका अनुसार, “कोडोमा ग्लाइसेमिक इन्डेक्स कम हुने भएकाले यसले रक्तमा चिनीको मात्रा सन्तुलनमा राख्न मद्दत गर्छ। त्यसैगरी, यसमा पाइने प्रशस्त फाइबरले हृदय स्वास्थ्य सुदृढ गर्न सहयोग पुर्याउँछ। सिँचाइको आवश्यकता नपर्ने यो अन्न बाली स्वास्थ्यका हिसाबले निकै लाभदायक छ।”
प्रधानमन्त्री ओलीले सरकारले कोदो प्रवर्द्धनका लागि यो वर्षदेखि **साउन १६ गतेलाई ‘राष्ट्रिय कोदो दिवस’**को रूपमा मनाउने निर्णय गरेको जानकारी पनि दिएका छन्।
अन्त्यमा उनले कोदो उत्पादन विस्तार र यसको सेवनलाई प्रोत्साहन गर्न पुनः जोड दिँदै लेखेका छन्, “कोदो उत्पादन बढाऔँ, कोदोका परिकार उपभोग गरौँ ! राष्ट्रिय कोदो दिवसको शुभकामना !”
प्रकाशित मिति: १६ श्रावण २०८२, शुक्रबार
प्रतिक्रिया