सङ्खुवासभा। सङ्खुवासभाको धर्मदेवी नगरपालिका–९ मुलगाउँबाट झापा दमक जाँदै गरेको यात्रुबाहक बस दुर्घटनामा परेर १४ जना यात्रु घाइते भएका छन्।
बा २ प ७२४४ नम्बरको बस लालीगुराँस नगरपालिका–१, देउराली घुम्तीमा अनियन्त्रित भई झण्डै १० मिटर तल सडकबाट खसेको जिल्ला प्रहरी कार्यालय तेह्रथुमका प्रहरी नायब उपरीक्षक लीलाराज लामिछानेले जानकारी दिए।
घटनामा घाइते हुनेहरूमा धर्मदेवी नगरपालिका–९ का २३ वर्षीय सविन विष्ट, धर्मदेवी–७ का २५ वर्षीय भवानी कार्की, ७ वर्षीया असीमित भारती, ९ वर्षीया हिरा भारती, ५६ वर्षीया रत्नमाया कटुवाल, १२ वर्षीय विष्णु कटुवाल, मनकुमार कटुवाल, ५२ वर्षीया धनमाया चापागाईं, धर्मदेवी–६ का ५२ वर्षीय श्रीमान तामाङ, १५ वर्षीया प्रतिमा कटुवाल, १६ वर्षीया सोममाया याईम, ३० वर्षीय सुजन कटुवाल, ६२ वर्षीय दलबहादुर कार्की र धनकुटाको महालक्ष्मी नगरपालिका–१ का २४ वर्षीय विमल विक छन्।
प्रहरीका अनुसार सविन विष्टको अवस्था गम्भीर रहेकाले उपचारका लागि धरानस्थित बीपी कोइराला स्वास्थ्य विज्ञान प्रतिष्ठान पठाइएको छ भने अन्य घाइतेहरूको बसन्तपुर अस्पतालमा उपचार भइरहेको जनाइएको छ।
दुर्घटनापछि बसका चालक धर्मदेवी–६ का खेम महत फरार रहेको र खोजी भइरहेको प्रहरीको भनाइ छ। घटनाको थप अनुसन्धान भइरहेको जनाइएको छ।
प्रकाशित मिति: १७ श्रावण २०८२, शनिबार
प्रतिक्रिया