काठमाडाैं । रूपन्देहीको सियारी गाउँपालिकामा आइतबार बिहान भएको मोटरसाइकल दुर्घटनामा परी एक जनाको मृत्यु भएको छ, भने अर्का एक जना गम्भीर घाइते भएका छन्। मृतक र घाइते बाबु–छोरा रहेको प्रहरीले पुष्टि गरेको छ।
जिल्ला प्रहरी कार्यालय रूपन्देहीका डिएसपी गणेश सापकोटाका अनुसार सियारी गाउँपालिका–७, भर्थापुरमा भएको दुर्घटनामा मायादेवी गाउँपालिका–७, गर्गटी निवासी ६० वर्षीय राम मिलन धवलको ज्यान गएको हो।
उनका छोरा ३० वर्षीय विनोद धवलले चलाएको मोटरसाइकल अनियन्त्रित भई आफैं दुर्घटनामा परेको थियो। दुर्घटनामा घाइते भएका दुबै जनालाई उपचारका लागि अस्पताल पुर्याइएको भए पनि बाबु राम मिलन धवलको उपचारका क्रममा मृत्यु भएको हो ।
छोरा विनोदको भैरहवास्थित सिटी अस्पतालमा उपचार भइरहेको छ। उनको टाउको, हात र खुट्टामा चोट लागेको प्रहरीले जानकारी दिएको छ।
दुर्घटनाबारे थप अनुसन्धान भइरहेको प्रहरीले जनाइएको छ।
प्रकाशित मिति: १८ श्रावण २०८२, आइतबार
प्रतिक्रिया