काठमाडौं । राष्ट्रिय प्रजातन्त्र पार्टी (राप्रपा) का नेता राजु गैरेले पार्टीभित्र उत्पन्न विवाद र आफूमाथि भएको दुर्व्यवहारको विरोधमा छिट्टै अनशन बस्ने घोषणा गरेका छन्। उनले राजनीतिक संरक्षणमा भएको अन्याय र आन्तरिक पार्टी संरचनामा देखिएको कमजोर नैतिकताको विरोध गर्दै सामाजिक सञ्जालमार्फत कडा धारणा सार्वजनिक गरेका हुन्।
गैरेका अनुसार, उनीमाथि भएको कुटपिटको घटना सामान्य नभई योजनाबद्ध भएको र त्यसमा पार्टी नेतृत्व स्वयं संलग्न रहेको शंका लाग्ने गरी घटनाहरू घटेका छन्। उनले पार्टी अध्यक्षप्रति इङ्गित गर्दै भनेका छन्, “गुन्डा कार्यकर्तालाई साथमा लिएर अध्यक्ष आफैँ अघि सरेको देख्दा म छक्क परेको छु।”
उनले आरोप लगाएका छन् कि राजनीतिक शक्तिको प्रयोग गरी प्रहरी प्रशासनलाई निष्क्रिय बनाइएको र न्यायका लागि आवाज उठाउनेहरूलाई दबाउने प्रयास भइरहेको छ। गैरेले थपे, “यदि कसैले मलाई गाली गर्न वा कुट्न चाहन्छ भने खुलेर आउनुस्, म प्रतिकार गर्नेछैन।”
गैरेले आफूमाथि हेल्मेट प्रहार भएको घटनालाई स्मरण गराउँदै भनेका छन् कि आज जुन व्यवहार आफ्नो टाउकोमा भएको छ, त्यो भोलि अन्य कार्यकर्तामाथि पनि हुनसक्ने सम्भावना रहेकोले उनले यो चेतना जगाउन चाहेको बताए।
उनले पार्टी नेतृत्वप्रति असन्तुष्टि जनाउँदै भनेका छन् कि कार्यकर्तामाथि अन्याय हुँदा समेत दोषीमाथि कारबाही नभएको र पीडितलाई नै दोहोरो पीडा दिन खोजिएको छ। यस्ता अवस्थाले कार्यकर्ताको सुरक्षा गम्भीर प्रश्नमा परेको उनको दाबी छ।
गैरेले आफ्नो अनशन कार्यक्रमको मिति चाँडै सार्वजनिक गरिने जानकारी दिएका छन्। उनले भनेका छन्, “म मेरो व्यक्तिगत न्यायका लागि मात्र होइन, म जस्तै लाखौँ जनताको प्रतिनिधित्व गर्दै यो कदम चाल्दैछु।”
प्रकाशित मिति: २० श्रावण २०८२, मंगलबार
प्रतिक्रिया