गुल्मी। गुल्मीको सत्यवती गाउँपालिका–६ उर्लीखोलामा रहेको डहरे खोलाले एक कार बगाएको छ। मंगलबार बिहान ११:४५ बजे शान्तिपुरबाट बुटवलतर्फ जाँदै गरेको बीएए ००१७ नम्बरको कार खोलामा आएको भेलसँगै बगेर करिब ५० मिटर तल पुगेको जिल्ला प्रहरी कार्यालय गुल्मीले जनाएको छ।
सङ्कटकालीन अवस्थामा स्थानीयवासी र ट्र्याक्टरको सहयोगमा कारलाई खोलाबाट बाहिर निकालिएको भए पनि सवारीमा क्षति पुगेको छ। यद्यपि मानवीय क्षति भने भएको छैन।
जिल्ला प्रहरी कार्यालय गुल्मीका प्रहरी नायब उपरीक्षक गङ्गाबहादुर सारुले पक्की पुलको अभावले जोखिम बढेको र यात्रुहरूलाई वर्षायाममा सास्ती भोग्नुपरेको जानकारी दिए।
गएको केही दिनदेखि गुल्मी लगायतका पहाडी क्षेत्रमा निरन्तर वर्षा भइरहेको छ। त्यसकै कारण खोलामा पानीको बहाव अस्वाभाविक रूपमा बढेको छ। डहरे खोला हुँदै बुटवल जाने यात्रु सवारीहरू वर्षातमा घण्टौंसम्म बाटोमै रोकिन बाध्य छन्।
रिडीदेखि वामिटक्सार हुँदै बाग्लुङ जोड्ने यो प्रमुख सडकको विभिन्न खण्डमा अझै पक्की पुल निर्माण नभएकोले हरेक वर्षातमा यस्तै समस्या दोहोरिन्छ। चारवटा मुख्य स्थानमा पक्की पुल नबन्दा सवारी साधनहरू नियमित रूपमा जोखिममा पर्ने गरेका छन्।
यस क्षेत्रमा यात्रा गर्नेहरूको मुख्य गुनासो भनेकै डहरे खोलामा पक्की पुलको अभाव हो। मुसिकोट नगरपालिका–४ भुवाचिदीका समाजसेवी ज्ञानहरी सापकोटाले पक्की पुल नहुँदा नागरिकहरू दिनहुँ ज्यानको जोखीम मोलेर यात्रा गर्न बाध्य भएको बताए।
हाल सडक डिभिजन कार्यालय पाल्पाको समन्वयमा सत्यवती गाउँपालिकाको नादेवा खोला, डहरे खोला, चोरकाटे (भार्से खोला) र गिद्दी खोलामा पक्की पुल निर्माणको काम भइरहेको छ।
रिडी–रुद्रावेनी–वामिटक्सार मार्ग गुल्मी र बाग्लुङ जिल्ला जोड्ने ऐतिहासिक सडक हो, जसमा यातायातको चाप उच्च रहेको भए पनि आधारभूत पूर्वाधार अभावले यात्रुहरू सधैं जोखिममा छन्।
स्थानीय सरकार र सम्बन्धित निकायले पक्की पुल निर्माणमा प्राथमिकता नदिएसम्म यस्ता दुर्घटना दोहोरिइरहने निश्चित देखिन्छ।
प्रकाशित मिति: २० श्रावण २०८२, मंगलबार
प्रतिक्रिया