काठमाडौं । भारतीय प्रधानमन्त्री नरेन्द्र मोदीले आफ्नो देशका किसानहरूको हितलाई सबैभन्दा माथि राख्ने प्रतिबद्धता व्यक्त गरेका छन्। यो अभिव्यक्ति अमेरिकी राष्ट्रपति डोनाल्ड ट्रम्पले भारतमाथि २५ प्रतिशत अतिरिक्त भन्सार शुल्क (ट्यारिफ) लगाउने घोषणा गरेपछि आएको हो।
हाल भारत र अमेरिकाबीच व्यापार सम्झौता हुन नसकेको मुख्य कारण भनेको भारतले आफ्नो कृषि बजार खुला गर्न अस्वीकार गर्नु हो। यसकारण अमेरिकाले भारतबाट आयात हुने उत्पादनहरूमा ५० प्रतिशतसम्म कर लगाउँदै आएको छ।
प्रधानमन्त्री मोदीले नयाँ दिल्लीमा आयोजित एक कार्यक्रममा भने, “देशका किसानको हित हाम्रो सर्वोच्च प्राथमिकता हो। हामी कहिल्यै पनि हाम्रो किसानको हितविपरीत सम्झौता गर्ने पक्षमा छैनौं।”
उनले यो निर्णयले व्यक्तिगत रूपमा ठूलो मूल्य चुकाउनुपर्ने भए पनि त्यसका लागि तयार रहेको पनि बताए। यद्यपि, ट्रम्पको कर घोषणाप्रति मोदीले प्रत्यक्ष रूपमा कुनै टिप्पणी गरेका छैनन् र बिहीबार पनि उनले अमेरिकी राष्ट्रपति वा कर विषयलाई खुलेर उल्लेख गरेनन्।
अमेरिका भारतलाई ठूलो बजारको रूपमा हेरे पनि भारतले खाद्य सुरक्षा, किसानहरूको जीविकोपार्जन र लाखौँ जनताको हितलाई संरक्षण गर्न भन्सार शुल्क मार्फत आवश्यक कदम चालिरहेको छ।
ट्रम्पले बुधबार भारतमाथि २५ प्रतिशत अतिरिक्त आयात कर लगाउने घोषणा गरेका थिए भने भारतले पनि अमेरिकी कृषि उत्पादनमाथि शून्यदेखि १५० प्रतिशतसम्मको भन्सार शुल्क लागू गर्दै आएको छ।
दिल्लीस्थित ग्लोबल ट्रेड रिसर्च इनिसिएटिभ (जीटीआरआई) का अनुसार, भारतमा अमेरिकी कृषि उत्पादनमा औसत ३७.७ प्रतिशत कर लाग्छ, जबकि अमेरिकामा भारतीय कृषि उत्पादनमाथि मात्र ५.३ प्रतिशत कर लाग्ने गर्दछ।
यो असमान कर संरचनाले दुई देशबीच व्यापार विवादलाई झन् तीव्र बनाएको छ।
प्रकाशित मिति: २२ श्रावण २०८२, बिहिबार
प्रतिक्रिया