काठमाडाैं । भारतमा विपक्षी सांसदहरूले सोमबार ‘भोट चोरी’ को गम्भीर आरोपलाई लिएर संसद भवनदेखि निर्वाचन आयोगको कार्यालयसम्म विरोध प्रदर्शन गर्ने तयारी गरेका छन्।
समाचार एजेन्सी पीटीआईका अनुसार, यो प्रदर्शन लोकसभामा विपक्षी नेता राहुल गान्धीको नेतृत्वमा हुने छ। विपक्षी दलहरूले प्रमुख निर्वाचन आयुक्त तथा अन्य दुई आयुक्तसँग भेट गर्ने समय मागेका छन्।
त्यसैगरी, कांग्रेस अध्यक्ष मल्लिकार्जुन खड्गेले सोमबार साँझ इन्डिया एलायन्सका सांसदहरूको लागि रात्रिभोजको आयोजना गर्ने तयारी गरेका छन्। यो भेला बिहारमा मतदाता सूचीमा भएको विशेष संशोधन र कथित ‘चुनावी धाँधली’ विरुद्ध एकजुट प्रयासका लागि आयोजना गरिएको हो।
यसअघि राहुल गान्धीले केही राज्यहरूमा ‘भोट चोरी’ भएको आरोप लगाएका थिए। आइतबार कर्नाटकका मुख्य निर्वाचन आयुक्तले गान्धीविरुद्ध सूचना जारी गर्दै, उनले उल्लेख गरेको ‘एक महिलाले दुई पटक मतदान गरेको’ घटनाको प्रमाण पेश गर्न भनेका छन्।
प्रकाशित मिति: २६ श्रावण २०८२, सोमबार
प्रतिक्रिया