काठमाडाैं । राष्ट्रिय स्वतन्त्र पार्टी (रास्वपा) का कार्यवाहक सभापति डोलप्रसाद अर्यालले रास्वपाको संसद प्रवेशपछि संसदको कामकाज अझ प्रभावशाली र दर्शनीय बनेको बताएका छन्। पार्टीको युवा विभागले मंगलबार ललितपुरमा आयोजना गरेको कार्यक्रममा बोल्दै उनले वर्तमान संसदलाई अब केवल नेपालको मात्र होइन, विदेशमा रहेका नेपालीहरूले पनि ध्यान दिएर हेर्ने र सुन्ने वातावरण बनेको बताए।
अर्यालले भने, “रास्वपाले आफूलाई जति व्याख्या गरे पनि हामी त्यो मात्रै होइनौं। सदन अहिले हेर्न र सुन्न लायक बनेको छ भन्ने कुरा देशभर र विदेशमा पनि सुनिन्छ। यसको मतलब सबैले रास्वपा हुनुपर्छ भन्ने होइन।”
उनले आगामी पुस्तालाई लक्षित गर्दै नीति निर्माणमा आधुनिक दृष्टिकोण अपनाउनुपर्नेमा जोड दिए। उनले भने, “संघीयता र नयाँ संविधान लागू भइसकेको अवस्थामा अब ५० वर्षे देशनिर्माणको योजना तयार गर्नुपर्छ, जसले युवा पुस्तालाई समेटोस् र राजनीतिक क्षेत्रमा युवाको भूमिका अपरिहार्य बनेको छ।”
प्रकाशित मिति: २७ श्रावण २०८२, मंगलबार
प्रतिक्रिया