काठमाडौँ । ऊर्जा, जलस्रोत तथा सिंचाइमन्त्री दीपक खड्काले मुलुकमा लोडसेडिङ भइरहेको भन्ने समाचार र हल्ला निराधार भएको स्पष्ट पारेका छन्। बुधबार प्रतिनिधिसभाको बैठकमा सांसदहरूको मौखिक प्रश्नको जवाफ दिँदै उनले केही क्षेत्रबाहेक देशभर विद्युत् आपूर्ति सहज रूपमा भइरहेको बताए।
मन्त्री खड्काले भने, “हामीले विद्युत् उत्पादन र आपूर्ति सुधारलाई तीव्रताका साथ अगाडि बढाएका छौँ। उत्पादन पनि निरन्तर भइरहेको छ, त्यसैले लोडसेडिङको कुरा निरर्थक छ।”
उनका अनुसार, सरकारले विद्युत् विस्तार र आपूर्तिमा गति दिँदै हालसम्म १७ अर्ब ७२ करोड रुपैयाँ बराबरको विद्युत् निर्यात गरेको छ भने १२ अर्ब ९२ करोड बराबरको विद्युत् आयात भइरहेको छ। यसरी झन्डै ५ अर्ब रुपैयाँ बराबरको व्यापारिक नाफा भएको उनले जानकारी दिए।
मन्त्री खड्काले अझै केही क्षेत्रमा विद्युत् आपूर्ति पुरा नभए पनि ती स्थानमा विस्तारका काम भइरहेको उल्लेख गर्दै निकट भविष्यमा सम्पूर्ण मुलुकमा स्थिर र भरपर्दो विद्युत् सेवा सुनिश्चित गरिने आश्वासन दिए।
प्रकाशित मिति: २८ श्रावण २०८२, बुधबार
प्रतिक्रिया